(វ៉ាស៊ីនតោន)៖ នាយក FBI ត្រូវបណ្ដេញចេញពីតំណែង លោក ជែមស៍ ខូមី (James Comey) គ្រោងនឹងផ្ដល់សក្ខីកម្មជាសាធារណៈ នៅចំពោះមុខព្រឹទ្ធសភាអាមេរិក នៅដើមសប្ដាហ៍ក្រោយនេះ ដើម្បីបកស្រាយ ក៏ដូចជាបញ្ជាក់ពីការចោទប្រកាន់ដែលថា ប្រធានាធិបតីអាមេរិក លោក ដូណាល់ ត្រាំ បានសុំឱ្យរូបលោកបញ្ឈប់ការស៊ើបអង្កេត លើទំនាក់ទំនងរវាងអតីតទីប្រឹក្សាសន្តិសុខជាតិ លោក មីសែល ហ្លីន ( Michael Flynn) ជាមួយនឹងមន្ត្រីរុស្ស៊ី។ នេះបើតាមប្រភពស្និទ្ធនឹងបញ្ហានេះ ដកស្រង់ដោយសារព័ត៌មាន CNN នៅព្រឹកថ្ងៃព្រហស្បតិ៍ ទី០១ ខែមិថុនា ឆ្នាំ២០១៧។
យោងតាមប្រភពខាងលើដដែល លោក ជែមស៍ ខូមី ត្រូវបានគេរំពឹងថា នឹងបង្ហាញខ្លួននៅចំពោះមុខគណៈកម្មធិការព្រឹទ្ធសភា ក្នុងក្របខណ្ឌនៃការស៊ើបអង្កេតពាក់ព័ន្ធនឹងទំនាក់ទំនង រវាងក្រុមយុទ្ធនាការឃោសនាបោះឆ្នោតរបស់ លោក ដូណាល់ ត្រាំ និងទីក្រុងម៉ូស្គូ នៅអំឡុងការបោះឆ្នោតជ្រើសរើសប្រធានាធិបតីអាមេរិក កាលពីឆ្នាំ២០១៦។ ក៏ប៉ុន្តែ នៅពេលផ្ដល់សក្ខីកម្មនោះដែរ អតីតនាយក FBI រូបនេះ ទំនងជានឹងមិនផ្ដោតសំខាន់លើរឿងនេះទេ ពោលគឺលោកអាចនឹងពិភាក្សាត្រឹមតែ ជុំវិញភាពតានតឹងនៃទំនាក់ទំនងរវាង លោកជាមួយ លោក ដូណាល់ ត្រាំ មុននឹងលោកត្រូវបញ្ចប់តួនាទីប៉ុណ្ណោះ។
គួរបញ្ជាក់ថា ដោយសារតែរឿងអាស្រូវនៃទំនាក់ទំនងជាមួយរុស្ស៊ី របស់ក្រុមមន្រ្តី លោក ដូណាល់ ត្រាំ វាបានធ្វើឱ្យមានការបែកបាក់យ៉ាងខ្លាំង នៅក្នុងចំណោមអ្នកនយោបាយអាមេរិក ហើយក៏បានជំរុញឱ្យប្រធានាធិបតីអាមេរិករូបនេះ ចាត់ទុកផងដែរថា ការផ្សាយព័ត៌មានទាំងនេះ ដោយសារព័ត៌មានអាមេរិកដូចជា New York Times, Washington Post, និង CNN គឺជាព័ត៌មានក្លែងក្លាយ ហើយព័ត៌មានក្លែងក្លាយគឺជាសត្រូវ៕
