(វ៉ាស៊ីនតោន)៖ ទីបំផុតនាយករដ្ឋមន្ត្រីវៀតណាម លោក Nguyen Xuan Phuc បានទៅដល់រដ្ឋធានីវ៉ាស៊ីនតោន និងជួបពិភាក្សាជាមួយប្រធានាធិបតីអាមេរិក លោក ដូណាល់ ត្រាំ នៅឯសេតវិមាន ដែលជាសញ្ញាថា អតីតសត្រូវធ្លាប់ស៊ីសាច់ស្រស់ឈាមស្រស់ទាំងពីរ កំពុងព្យាយាមកសាងសម្ព័ន្ធភាព ដើម្បីទប់ទល់ឥទ្ធិពលមហាអំណាចនៅតំបន់អាស៊ី នោះគឺប្រទេសចិន។ នេះបើតាមការដកស្រង់ការផ្សាយ ពីបណ្តាញព័ត៌មានអាមេរិក U.S News នៅព្រឹកថ្ងៃព្រហស្បតិ៍ ទី០១ ខែមិថុនា ឆ្នាំ២០១៧។
ជំនួបពិភាក្សាជាលើកដំបូងនៅអាមេរិក ដ៏គួរឲ្យចាប់អារម្មណ៍រវាងលោក ត្រាំ និង Phuc ក៏មានការចូលរួមដោយអនុប្រធានាធិបតី លោក Mike Pence ផងដែរ។ នៅក្នុងឱកាសនោះ លោក Phuc បានលើកឡើងថា «វៀតណាមបានយកឈ្នះឧបសគ្គជាច្រើន នៅក្នុងការក្លាយខ្លួនជាប្រទេសដែលមានទំនាក់ទំនងយ៉ាងល្អ និងដើម្បីក្លាយខ្លួនជាដៃគូយុទ្ធសាស្ត្រ គ្រប់ជ្រុងជ្រោយជាមួយអាមេរិក»។
នៅមុនកិច្ចប្រជុំប្រព្រឹត្តទៅ លោក ត្រាំ ក៏បានបញ្ជាក់ផងដែរថា លោកនឹងលើកយកប្រធានបទសំខាន់ៗ ក្នុងនោះក៏មានពាណិជ្ជកម្មផងដែរ។ មេដឹកនាំអាមេរិកបានអះអាងទៀតថា វៀតណាមបានធ្វើការបញ្ជាទិញក្នុងតម្លៃរាប់ពាន់លានដុល្លារ ដែលវាមានន័យថា ជាការផ្តល់ការងារសម្រាប់អាមេរិក និងជាឧបករណ៍ ដ៏អស្ចារ្យរបស់វៀតណាម ប៉ុន្តែលោក ត្រាំ មិនបានបញ្ជាក់ថា ការបញ្ជាទិញនោះជាអ្វីទេ។
គួរបញ្ជាក់ថា លោក Phuc ជាមេដឹកនាំប្រទេសអាស៊ានដំបូងគេ ដែលបានទៅបំពេញទស្សនកិច្ចនៅអាមេរិក តបតាមការអញ្ជើញរបស់លោក ដូណាល់ ត្រាំ ហើយក្នុងនោះទីក្រុងវ៉ាស៊ីនតោនក៏បានអញ្ជើញនាយករដ្ឋមន្ត្រីថៃ, សិង្ហបុរី, និងប្រធានាធិបតីហ្វីលីពីន ព្រមជាមួយនិងឥណ្ឌូណេស៊ីផងដែរ ទៅបំពេញទស្សនកិច្ច ហើយវាប្រាកដណាស់ថា មានជាប់ពាក់ព័ន្ធនឹងបញ្ហាសមុទ្រចិនខាងត្បូង៕
