(អង់ការ៉ា)៖ កងកម្លាំងយោធាតួកគីសរុប ១៣នាក់បានស្លាប់ បន្ទាប់ពីឧទ្ធម្ភាគចក្រមួយគ្រឿងដែលដឹកពួកគេ​ជិះបានហោះទាក់ខ្សែភ្លើងដែលមានតង់ស្យុងខ្ពស់ បណ្តាលឲ្យធ្លាក់នៅភាគអាគ្នេយ៍ប្រទេសតែម្តង។ នេះបើការចេញ​ផ្សាយ​នៅមុននេះបន្តិច ដោយសារព័ត៌មាន Channel News Asia នាព្រឹកថ្ងៃព្រហស្បតិ៍ ទី០១ ខែមិថុនា ឆ្នាំ២០១៧។

ឧទ្ធម្ភាគចក្រខាងលើនេះមានលេខសម្គាល់ AS532 Cougar បានធ្លាក់​បន្ទាប់ពីទើបហោះចេញពីមូលដ្ឋាន​​យោធា​នៃស្រុក Sirnak ជាប់ព្រំដែនរវាងតួកគី និងអ៊ីរ៉ាក់ ដោយក្នុងនោះ​នាយទាហានទាំងអស់ ១៣នាក់​បាន​បាត់បង់ជីវិតគ្មានសល់ម្នាក់នោះទេ កាលពីថ្ងៃពុធសប្តាហ៍នេះ។ សេចក្តីថ្លែងការណ៍ដោយយោធាក្នុងតំបន់ បានឲ្យដឹងយ៉ាងដូច្នេះថា «សមមិត្តជាវីរៈបុរសរបស់យើង ស្ថិតនៅក្នុងឧទ្ធម្ភាគចក្រដែលបានធ្លាក់»។

តាមការសន្និដ្ឋានតំណាក់កាលដំបូង ការធ្លាក់របស់ឧទ្ធម្ភាគចក្រនោះ គឺជាឧប្បទ្ទវហេតុ ហើយយោធាកំពុង​តែបន្តការស៊ើបអង្កេតលើរឿងនេះទៀត។ អគ្គមេបញ្ជាយោធាប្រចាំតំបន់ លោកឧត្តមសេនីយ៍ Hulusi Akar បានធ្វើដំណើរទៅកាន់ទីកន្លែងកើតហេតុដោយផ្ទាល់ ដើម្បីធ្វើការស៊ើបអង្កេត ខណៈលោក Tayyip Erdogan ប្រធានាធិបតីតួកគី បានសម្តែងក្តីសោកស្តាយចំពោះគ្រោះថ្នាក់ខាងលើ និងស្នើឲ្យមានការ​កោះប្រជុំក្រុមប្រឹក្សាសន្តិសុខជាតិ នៅក្នុងទីក្រុងអង់ការ៉ាផងដែរ៕