(តូក្យូ)៖ នាយករដ្ឋមន្រ្តីជប៉ុននាពេលថ្មីៗនេះ បានសារភាពថារូបលោកធ្លាប់បានទទួលប្រាក់បៀរវត្សរ៍ គ្រឹះស្ថានសិក្សាមួយកន្លែង ដែលហ៊ុមព័ទ្ធដោយរឿងអាស្រូវថា ទទួលបានការអនុគ្រោះពិសេសពីរដ្ឋាភិបាលជប៉ុន ដើម្បីបើកដំណើរការដេប៉ាតេម៉ង់ (Department) ថ្មីមួយនៅឯសាកលវិទ្យាល័យមួយកន្លែង។ នេះបើតាមការចេញផ្សាយដោយសារព័ត៌មាន CGTN នៅយប់ថ្ងៃពុធ ទី៣១ ខែឧសភា ឆ្នាំ២០១៧។
ថ្លែងនៅក្នុងសភាជប៉ុនលោក ស៊ីនហ្សូ អាបេ បានឲ្យដឹងថា រូបលោកធ្លាប់បានទទួលប្រាក់ចំនួន១៤០,០០០យេន (១,២៦០ដុល្លារ) ក្នុងមួយឆ្នាំកាលពីមានតួនាទីជាអ្នកមើលការខុសត្រូវនៅក្នុងវិទ្យាស្ថានអប់រំ Kake ដែលបច្ចុប្បន្នជាម្ចាស់គ្រប់គ្រងរបស់សាកវិទ្យាល័យវិទ្យសាស្រ្ត Okayama។ លោក អាបេ បាននិយាយថា «ខ្ញុំធ្លាប់បានបម្រើការនៅក្នុងវិទ្យាស្ថាន Kake អស់រយៈពេលប៉ុន្មានឆ្នាំដែរ បន្ទាប់ពីខ្ញុំត្រូវបានបោះឆ្នោតជ្រើសរើសជាលើកដំបូង ធ្វើជាសមាជិកនៃសភាតំណាងរាស្រ្តកាលពីឆ្នាំ១៩៩៣»។ ម៉្យាងវិញទៀត លោក Kotao Kake ដែលជាអគ្គនាយកនៃវិទ្យាស្ថាននេះ ត្រូវបានគេស្គាល់ថា គឺជាមិត្តភក្តិដ៏ជិតស្និទ្ធម្នាក់របស់លោក អាបេ។
គួរបញ្ជាក់ថា កាលពីខែមករាកន្លងទៅនេះ សាកលវិទ្យាល័យ Okayama ដែលស្ថិតក្នុងខេត្ត Ehime ភាគលិចប្រទេសជប៉ុន ជាតំបន់យុទ្ធសាស្រ្តសេដ្ឋកិច្ច ពិសេសមួយរបស់ប្រទេសអាស៊ីខាងកើតមួយនេះនោះ ទទួលបានការអនុញ្ញាតពីរដ្ឋាភិបាល ឲ្យធ្វើការកសាងដេប៉ាតេម៉ង់បសុពេទ្យថ្មីមួយ។ ហើយវាគឺជា លើកទីមួយហើយក្នុងអំឡុងពេលប្រមាណជាកន្លះសតវត្សរ៍ចុងក្រោយនេះ ដែលរដ្ឋាភិបាលជប៉ុន បានអនុញ្ញាតឲ្យមានការបើកសាលា ឬដេប៉ាតេម៉ង់ផ្នែកបសុពេទ្យថ្មីបែបនេះ។
ជុំវិញរឿងនេះបក្សប្រឆាំងនៅជប៉ុន ក៏ដូចជាមជ្ឈដ្ឋានមួយចំនួនទៀត បានជឿជាក់ថាលោក ស៊ីនហ្សូ អាបេ ប្រហែលជាបានប្រើប្រាស់ឥទ្ធិពលរបស់លោកក្នុងនាមជាមេដឹកនាំប្រទេស ទៅលើការសម្រេចចិត្តនេះ ដែលជារឿងលោក អាបេ ផ្ទាល់បានបដិសេធចោល។ ជាមួយគ្នានេះប្រធានគណៈរដ្ឋមន្រ្តីលោក Yoshihide Suga ក៏បានចេញមុខលើកឡើងដែរថា «តើវាមានរឿងអ្វីខុសទៅ ដែលលោកនាយករដ្ឋមន្រ្តី ធ្លាប់បានបម្រើការងារនៅក្នុងគ្រឹះស្ថានអប់រំមួយ ហើយទទួលបានប្រាក់កំរៃពីតួនាទីរបស់លោកនោះ»៕
