(ឡុងដ៍)៖ កញ្ញា Ariana Grande នឹងប្រារព្ធការប្រគុំតន្រ្តីសប្បុរសធម៌មួយ នៅក្នុងទីក្រុង Manchester នាថ្ងៃអាទិត្យសប្តាហ៍នេះ ដែលនឹងមានការចូលពីសំណាក់តារាចម្រៀងល្បីៗជាច្រើនរូបទៀត របស់សហរដ្ឋអាមេរិកនិងចក្រភពអង់គ្លេស រួមមានក្រុម Coldplay, លោក Justin Bieber, កញ្ញា Katy Perry, កញ្ញា Miley Cyrus, និងលោក Pharrell Williams ដើម្បីជួយដល់ជនរងគ្រោះ ក្នុងការវាយប្រហារភេរវកម្ម ដោយបំផ្ទុះគ្រាប់បែកអត្តឃាតដ៏រន្ធត់កាលពីដើមសប្តាហ៍មុន។ នេះបើតាមការចេញផ្សាយដោយទីភ្នាក់ងារព័ត៌មាន Associated Press (AP) នៅយប់ថ្ងៃអង្គារ ទី៣០ ខែឧសភា ឆ្នាំ២០១៧។
សូមរំលឹកថា ហេតុការណ៍ផ្ទុះគ្រាប់បែកដ៏កក្រើកមួយ បានកើតឡើងនាវេលាម៉ោងប្រមាណ១០៖៣៥នាទី យប់ថ្ងៃចន្ទដើមសប្តាហ៍មុននេះ (ម៉ោងក្នុងតំបន់កើតហេតុ) នៅសាលប្រគុំតន្រី្ត Manchester Arena ក្នុងទីក្រុង Manchester របស់ចក្រភពអង់គ្លេស ដែលមានការចូលរួមសម្តែងដោយតារាចម្រៀងប៉ុបដ៏ល្បីរបស់សហរដ្ឋអាមេរិកគឺកញ្ញា Ariana Grande ហើយវាបានឆក់យកជីវិតមនុស្សចំនួន២២នាក់ និងបានបណ្តាលឲ្យរាប់សិបនាក់ផ្សេងទៀតរបួសយ៉ាងដំណំ។ ក្រោយការវាយប្រហារនេះ កញ្ញ Grande បានសម្តែងនូវការបួងសួង និងសមានទុក្ខយ៉ាងជ្រាលជ្រៅអស់ពីបេះដូង ជូនចំពោះជនរងគ្រោះទាំងអស់ និងបានសន្យាថានឹងវិលត្រឡប់មកប្រគុំតន្រ្តីសាជាថ្មីម្តងទៀត ដើម្បីរៃអង្គាសថវិកាសម្រាប់ជួយជនរងគ្រោះទាំងអស់ និងក្រុមគ្រួសាររបស់ពួកគេ។
គួរបញ្ជាក់ផងដែរថា ព្រឹត្តិការណ៍ប្រគុំតន្រ្តី One Love Manchester នឹងប្រព្រឹត្តទៅនៅក្នុងពហុកីឡាដ្ឋាន Old Trafford នៃទីក្រុង Manchester នាថ្ងៃទី០៤ ខែមិថុនា (ពេលវេលានៅអង់គ្លេស) ហើយថវិកាដែលរកបានទាំងប៉ុន្មាន នឹងត្រូវប្រគល់ជូនមូលនិធិសង្រ្គោះបន្ទាន់ របស់ទីក្រុងនិងកាកបាទក្រហមនៃចក្រភពអង់គ្លេស៕
