(ប៊ែរឡាំង)៖ ក្រុមមន្រ្តីប៉ូលិសអាល្លឺម៉ង់បានឲ្យដឹងថា ពួកគេបានធ្វើការឃាត់ខ្លួនជនជាតិស៊ីរីម្នាក់ មានវ័យ១៧ឆ្នាំ នៅជាយក្រុងប៊ែរឡាំង ក្រោមការសង្ស័យថាយុវជនរូបនេះ កំពុងរៀបចំគម្រោងការវាយប្រហារដោយអត្តឃាត ដ៏ខ្មៅងងឹតមួយនៅក្នុងរដ្ឋធានីនៃប្រទេសអឺរ៉ុបមួយនេះ។ នេះបើតាមការចេញផ្សាយដោយសារព័ត៌មាន BBC News នៅយប់ថ្ងៃអង្គារ ទី៣០ ខែឧសភា ឆ្នាំ២០១៧។
អាជ្ញាធរប្រចាំរដ្ឋ Brandenburg បានប្រកាសនៅថ្ងៃអង្គារនេះថា ជនសង្ស័យខាងលើត្រូវចាប់ខ្លួនបាន នៅក្នុងសង្កាត់ Uckermark ភាគឦសាននៃរដ្ឋធានីប៊ែរឡាំង។ យ៉ាងណាមិញព័ត៌មានលម្អិតភ្លាមៗថា តើជនរូបនេះជិតសម្រេចបានគោលដៅរបស់ខ្លួន ដល់កម្រិតណា ឬព័ត៌មានដទៃផ្សេងទៀត ទាក់ទិននឹងជនសង្ស័យម្នាក់នេះ ពុំទាន់ត្រូវបានដឹងច្បាស់ឡើយទេ។
សូមជំរាបថា ប្រទេសអាល្លឺម៉ង់ ធ្លាប់បានទទួលរងការវាយប្រហារ ដោយភេរវកម្មជាច្រើនលើក កាលពីឆ្នាំ២០១៦ តួយ៉ាងកាលពីខែធ្នូ ឆ្នាំមុននេះ ជនដៃដល់ម្នាក់មានសញ្ជាតិទុយនេស៊ី បានបើកការវាយប្រហារភេរវកម្មទៅលើ ផ្សាររាត្រីសម្រាប់បុណ្យណូអែលមួយកន្លែងក្នុងទីក្រុងប៊ែរឡាំង តាមរយៈការបើករថយន្តធុនធំបំបុកមនុស្សស្លាប់ចំនួន១២នាក់ និងបានបណ្តាលឲ្យជាច្រើននាក់ទៀតរងរបួសយ៉ាងដំណំ៕
