(ប៊ែរឡាំង)៖ ប្រមុខការទូតអាល្លឺម៉ង់ លោក Sigmar Gabriel បានគូសបញ្ជាក់ថា សកម្មភាពរបស់ប្រធានាធិបតីអាមេរិក លោក ដូណាល់ ត្រាំ បាននិងកំពុងធ្វើឱ្យអឺរ៉ុបចុះទន់ខ្សោយ ខណៈភាពស្រពិចស្រពិលនៃនយោបាយអាមេរិក អាចនឹងធ្វើឱ្យប៉ះពាល់ផលប្រយោជន៍អឺរ៉ុប។ នេះបើតាម ការចញផ្សាយដោយសារព័ត៌មាន Sputnik នៅល្ងាចថ្ងៃអង្គារ ទី៣០ ខែឧសភា ឆ្នាំ២០១៧។
ថ្លែងនៅក្នុងសន្និសីទសារព័ត៌មាន ស្ដីពីទំនាក់ទំនងរវាងសហភាពអឺរ៉ុប និងសហរដ្ឋអាមេរិកក្នុងទីក្រុងប៊ែរឡាំង លោក Sigmar Gabriel បាននិយាយ ដោយមិនចំឈ្មោះលោក ត្រាំ យ៉ាងដូច្នេះថា «មនុស្សទំាងឡាយ ដែលជំរុញឱ្យមានបម្រែបម្រួលអាកាសធាតុ តាមរយៈការកាត់បន្ថយកិច្ចការពារបរិស្ថាន ឬអ្នកដែលចូលចិត្តលក់អាវុធឱ្យបានច្រើននៅក្នុងតំបន់ជម្លោះ ឬក៏អ្នកមិនចង់ដោះស្រាយជម្លោះសាសនា មនុស្សនោះគឺជាគ្រោះថ្នាក់ធំបំផុត ដល់សន្តិភាពនៅអឺរ៉ុប... ភាពស្រពិចស្រពិលនៃនយោបាយអាមេរិក អាចនឹងធ្វើឱ្យប៉ះពាល់ដល់ផលប្រយោជន៍សហភាពអឺរ៉ុប និងកំពុងធ្វើឱ្យអឺរ៉ុបទំាងមូលចុះទន់ខ្សោយ»។
គួរបញ្ជាក់ថា កាលពីប៉ុន្មានថ្ងៃមុននេះ ពោលគឺក្រោយជួប លោក ដូណាល់ ត្រាំ នៅក្នុងកិច្ចប្រជុំ G7 អធិការបតីអាល្លឺម៉ង់ លោកស្រី អាន់ជែឡា មឺគែល ក៏បានថ្លែងដែរថា អឺរ៉ុបត្រូវតែកំណត់ជោគវាសនារបស់ខ្លួនដោយខ្លួនឯង ដោយមិនអាចពឹងផ្អែកទាំងស្រុងលើទីក្រុងវ៉ាស៊ីនតោន ទៀតនោះទេ៕
