(អាមេរិក)៖ ទីភ្នាក់ងារអវកាស NASA នាពេលថ្មីៗនេះបានប្រកាសថា យានអវកាស LRO ដែលកំពុងធ្វើការសិក្សាស្រាវជ្រាវ នៅជុំវិញឋានព្រះច័ន្ទនោះ នាពេលថ្មីៗនេះបានទទួលរងការប៉ះទង្គិចគ្នាជាមួយនឹងអាចម៍ផ្កាយតូចមួយដុំ ដែលធ្វើដំណើរនៅក្នុងល្បឿនយ៉ាងលឿនជាងគ្រាប់កាំភ្លើង ក៏ប៉ុន្តែការប៉ះទង្គិចគ្នានេះពុំបានបង្កជាគ្រោះថ្នាក់ដល់យានអវកាស ឬមួយក៏ប្រតិបត្តិការនៅគន្លងគោចរនៃឋានព្រះច័ន្ទឡើយ។ នេះបើតាមការដកស្រង់ការផ្សាយចេញពីគេហទំព័រវិទ្យាសាស្រ្ត Space.com នៅរសៀលថ្ងៃអង្គារ ទី៣០ ខែឧសភា ឆ្នាំ២០១៧។
ក្រុមអ្នកវិទ្យាសាស្រ្តរបស់អង្គការ NASA បានដឹងអំពីហេតុការណ៍នេះ ក៏ដោយសារតែរូបភាពមួយប៉ុណ្ណោះ ថតបានពីយានអវកាស LRO ដែលមើលទៅមានភាពខុសប្រក្រតី។ លោក Mark Robinson ប្រធានក្រុមស៊ើបអង្កេតនៃប្រព័ន្ធកាមេរ៉ារបស់ LRO បានឲ្យដឹងថា «អាចម៍ផ្កាយនោះបានធ្វើដំណើរក្នុងល្បឿនលឿនជាងគ្រាប់កាំភ្លើងទៅទៀត។ នៅក្នុងករណីនេះ កាមេរ៉ារបស់ LRO មិនបានគេចចេញពីអាចម៍ផ្កាយនោះឡើយ តែក៏មិនបានរងផលប៉ះពាល់ធ្ងន់ធ្ងរដោយសារវាដែរ»។
គួរបញ្ជាក់ថា បើតាមក្រុមការងាររបស់ NASA វាប្រាកដជាអាចម៍ផ្កាយតូចមួយប៉ុណ្ណោះ ហើយការប៉ះទង្គិចគ្នានេះ បានកើតឡើងតាំងពីថ្ងៃទី១៣ ខែតុលា ឆ្នាំ២០១៤មកម្ល៉េះ ប៉ុន្តែដោយសារតែបញ្ហានេះ មិនបានបង្កការាំងស្ទះដល់បេសកកម្ម NASA ក៏បានសម្រេចចិត្តមិនប្រកាសឲ្យដឹង រហូតមកទល់ពេលថ្មីៗនេះ៕
