(ប៉ាណាម៉ា)៖ អតីតមេដឹកនាំផ្ដាច់ការនៃប្រទេសប៉ាណាម៉ា និងធ្លាប់ជាអ្នកយកការណ៍​ឱ្យ CIA លោក Manuel Noriega បានទទួលមរណៈភាព​ហើយ ក្នុងវ័យ៨៣ឆ្នាំ បន្ទាប់ពីទទួល​ការវះកាត់​ជំងឺដុះដុំសាច់ក្នុងខួរក្បាល ចាប់តាំងពីខែមីនាមក។ នេះបើតាមប្រធានាធិបតីប៉ាណាម៉ាបច្ចុប្បន្ន លោក Juan Carlos Varela ដកស្រង់ដោយ​ទីភ្នាក់ងារ​សារព័ត៌មាន New York Times នៅរសៀលថ្ងៃអង្គារ ទី៣០ ខែឧសភា ឆ្នាំ២០១៧។

លោក Juan Carlos Varela បានឱ្យដឹងយ៉ាងដូច្នេះថា «លោក Manuel Noriega ដែលសម្រាក​ព្យាបាលនៅក្នុងមន្ទីរពេទ្យ ចាប់តាំងពីខែមីនាមក ដោយសារជំងឺដុះដំសាច់ក្នុងខួរក្បាល បានទទួលមរណៈភាព នៅម៉ោង១១៖០០នាទីយប់ថ្ងៃចន្ទនេះ (ម៉ោងនៅក្នុងតំបន់) នៅឯមន្ទីរពេទ្យ Santo Tomás ក្នុងទីក្រុង Panama »។

គួរបញ្ជាក់ថា លោក Manuel Noriega បានដឹកនាំប្រទេស​ប៉ាណាម៉ា ពីឆ្នាំ១៩៨៣ ដល់ឆ្នាំ១៩៨៩ ត្រូវបានទម្លាក់ចេញពីតំណែង​ដោយទីក្រុងវ៉ាស៊ីនតោន នៅឆ្នាំ១៩៨៩ និងត្រូវបាន​ផ្ដន្ទាទោស​ពីបទរត់ពន្ធ​គ្រឿងញៀន ដែលធ្វើឱ្យលោក​ត្រូវជាប់ពន្ធនាគារ​ជិត ១៧ឆ្នាំ នៅ​សហរដ្ឋអាមេរិក។ បន្ទាប់មកទៀត លោកត្រូវជាប់ពន្ធនាគារ​ជាថ្មីរយៈពេល​ពីរឆ្នាំ នៅប្រទេសបារាំង ពីបទលាងលុយកខ្វក់ មុននឹងត្រូវធ្វើបត្យាប័នមកកាន់ប៉ាណាម៉ា នៅខែធ្នូ ឆ្នាំ២០១១។

ទោះជាយ៉ាងនេះក្ដី អតីតមេដឹកនាំ​ផ្ដាច់ការរូបនេះ បានចោទប្រកាន់ទីក្រុងវ៉ាស៊ីតោនថា បានចាប់លោកដាក់គុក​ដោយសារតែ លោកបានបដិសេធធ្វើកិច្ចសហប្រតិបត្តិការ​ជាមួយសហរដ្ឋអាមេរិក ក្នុងការផ្ដួលរំលំ​រដ្ឋាភិបាល​ឆ្វេងនិយម Nicaragua នៅអំឡុង​ឆ្នាំ១៩៨០៕