(គូឡាឡាំពួ)៖ ករណីឃាតកម្មដ៏កក្រើកទៅលើបងប្រុស មេដឹកនាំកំពូលកូរ៉េខាងជើង លោក គីម ជុងអ៊ុន គឺលោក គីម ជុងណាំ ត្រូវបានបញ្ជូនឡើងទៅតុលាការកំពូលហើយ នៅថ្ងៃអង្គារសប្តាហ៍នេះ ដោយស្ត្រីជាជនសង្ស័យចំនួនពីររូប នឹងត្រូវទទួលការសាកសួរជាបន្តទៀត។ នេះបើតាមការចេញផ្សាយនៅមុននេះបន្តិច ដោយ Channel News Asia នារសៀលថ្ងៃអង្គារ ទី៣០ ខែឧសភា ឆ្នាំ២០១៧។
ស្ត្រីជាជនសង្ស័យទាំងពីររូបគឺ ម្នាក់ឈ្មោះ Siti Aishah អាយុ ២៥ឆ្នាំជនជាតិឥណ្ឌូណេស៊ី និងម្នាក់ទៀតឈ្មោះ Doan Thi Huong អាយុ ២៨ឆ្នាំជាជនជាតិវៀតណាម។ ស្ត្រីទាំងពីររូបនេះ នឹងប្រឈមមុខទោសប្រហារជីវិតតាមច្បាប់របស់ម៉ាឡេស៊ី ប្រសិនបើតុលាការរកឃើញថា ពួកគេពិតជាបានចូលរួមគំនិត និងលួចធ្វើឃាត លោក គីម ជុងណាំ នៅព្រលានយន្តហោះទីក្រុងគូឡាឡាំពួ ដោយប្រើប្រាស់សារធាតុគីមី VX ជាអាវុធកាលពីថ្ងៃទី១៣ ខែកុម្ភៈ មែននោះ។
គួរបញ្ជាក់ថា បើតាមកាមេរ៉ាសុវត្ថិភាពនៅព្រលានយន្តហោះ ស្ត្រីសង្ស័យទាំងពីររូបនេះ បានយកក្រណាត់មានផ្ទុកសារធាតុគីមី VX ទៅខ្ទប់មុខ លោក គីម ជុងណាំ ខណៈដែលសារធាតុនេះត្រូវបានគេសង្ស័យថា មានប្រភពពីកូរ៉េខាងជើង និងត្រូវបានអង្គការសហប្រជាជាតិចាត់ទុកថា ជាអាវុធប្រល័យលោកមួយផងដែរ។ រដ្ឋាភិបាលកូរ៉េខាងត្បូង បានចោទទង្វើទាំងអស់ខាងលើនេះថា ជាការបញ្ជាដោយផ្ទាល់ពី លោក គីម ជុងអ៊ុន ប្រមុខដឹកនាំកំពូលទីក្រុងព្យុងយ៉ាង ដែលសម្លាប់សាច់ឈាមខ្លួនឯង៕
