(បង់ក្លាដែស)៖ ព្យុះស៊ីក្លូន Mora នៅថ្ងៃអង្គារនេះ បានវាយប្រហារក្នុងល្បឿន​ខ្យល់ ១១៧គីឡូម៉ត្រ​ក្នុងមួយម៉ោង មកលើតំបន់ឆ្នេរ​ស្ថិតនៅ ចន្លោះទីក្រុង​កំពង់ផែ Cox’s Bazar និង​ទីក្រុង Chittagong។ នេះបើតាមអាជ្ញាធរ​ឧតុនិយមបង់ក្លាដែស​ ដកស្រង់ដោយ​សារព័ត៌មាន The ​Hindu នៅព្រឹកថ្ងៃអង្គារ ទី៣០ ខែឧសភា ឆ្នាំ២០១៧។

ជាមួយគ្នានោះ​ដែរ អាជ្ញាធរឧតុនិយម​បង់ក្លាដែស​បានបញ្ជាក់ទៀតថា ព្យុះស៊ីក្លូននេះបានបក់បោក​ក្នុងល្បឿនខ្យល់​១១៧ គីឡូម៉ែត្រ​ក្នុងមួយ​ម៉ោង ខណៈគេក៏រំពឹង​ដែរថា ព្យុះនេះអាច​នឹងបង្កជាគ្រោះ​ទឹកជំនន់ ព្រមទាំងគ្រោះ​រអិលបាក់ដីផងដែរ។ ដោយឡែក​កាលពីចន្ទ ប្រជាជនបង់ក្លាដែស​រាប់ពាន់នាក់ ត្រូវបានជម្លៀស​ទៅកាន់ទីទួល​មានសុវត្ថិភាព រីឯ ទីក្រុងកំពង់ផែ​ជាច្រើនស្ថិត​នៅតំបន់ភាគ​អាគ្នេយ៍នៃប្រទេស ត្រូវបានដាក់​ឱ្យនៅក្នុងភាព​អាសន្នកំរិតទី១០ ហើយតំបន់​ភាគខាងលិច ស្ថិតកំរិតប្រកាសអាសន្ន​ទី០៨។

គួរបញ្ជាក់ថា ការមកដល់​នៃព្យុះស៊ីក្លូន Mora កើតឡើង​បន្ទាប់ពីព្យុះភ្លៀង និងគ្រោះរអិល​បាក់ដីនៅ​ប្រទេសស្រីលង្កា​ កាលពីប៉ុន្មាន​ថ្ងៃមុននេះ បានផ្ដាច់យក​អាយុជីវិតមនុស្ស​ជាង១៨០នាក់ និង១០០នាក់ផ្សេងទៀត​នៅបន្តបាត់ខ្លួន​នៅឡើយ៕