(ព្រុចសែល)៖ សហភាពអឺរ៉ុប (EU) នៅថ្ងៃចន្ទដើមសប្តាហ៍នេះ បានអូសបន្លាយពេលវេលា នៃការដាក់ទណ្ឌកម្មប្រឆាំងនឹងរដ្ឋាភិបាលស៊ីរី និងក្រុមអ្នកគាំទ្ររបស់លោក បាហ្សា អាល់ អាស្សាដ រយៈពេលមួយឆ្នាំបន្ថែមទៀត ពោលគឺទណ្ឌកម្មនឹងបន្តរហូតដល់ថ្ងៃទី០១ ខែមិថុនា ឆ្នាំ២០១៨។ នេះបើតាមការដកស្រង់ការផ្សាយពីសារព័ត៌មានស៊ិនហួរ នាព្រឹកថ្ងៃអង្គារ ទី៣០ ខែឧសភា ឆ្នាំ២០១៧នេះ។
ទណ្ឌកម្មដែលត្រូវបានដាក់កាលពីឆ្នាំ២០១១ ក្នុងនោះរួមមាន ការហ៊ុមព័ទ្ធសេដ្ឋកិច្ចប្រេង, ការរឹតបន្តឹងលើការវិនិយោគជាក់ស្តែង, និងការបង្កកទ្រព្យសម្បត្តិធនាគារកណ្តាលរបស់ស៊ីរី ដែលបានដាក់នៅសហភាពអឺរ៉ុប។ មនុស្សប្រមាណ ២៤០នាក់ និងអង្គភាព៦៧ ក៏ត្រូវបានរារាំងក្នុងការធ្វើដំណើរ និងបង្កកទ្រព្យសម្បត្តិផងដែរ។
គួរបញ្ជាក់ថា សហភាពអឺរ៉ុបនៅតែប្តេជ្ញាក្នុងការ ស្វែងរកដំណោះស្រាយនយោបាយល្អមួយ សម្រាប់ដោះស្រាយបញ្ហាជម្លោះនៅស៊ីរី ស្ថិតក្រោមក្របខណ្ អង្គការសហប្រជាជាតិ។ ជម្លោះនៅស៊ីរី ដែលបានឈានចូលដល់ឆ្នាំទី៧ហើយ ប៉ុន្តែមិនមានសញ្ញាថយចុះនោះទេ បានសម្លាប់មនុស្សជាង ៣១០,០០០នាក់ និងរាប់លាននាក់ទៀត បានក្លាយជាជនភៀសខ្លួនទាំងនៅក្នុងស្រុក នៅក្រៅប្រទេស៕
