(ម៉ូស្គូ)៖ ព្យុះកំណាចប្រៀបបីដូចជាព្យុះហឺរីខិននៅអាមេរិក ដែលបានវាយប្រហារយ៉ាងដំណំលើទីក្រុងម៉ូស្គូប្រទេសរុស្ស៊ី កាលពីល្ងាចថ្ងៃចន្ទ​ដើមសប្តាហ៍នេះ បានផ្តាច់យកជីវិតមនុស្សសរុប ១២នាក់ហើយ គិតត្រឹមព្រឹកថ្ងៃអង្គារ ខណៈមនុស្ស​១២៥នាក់ទៀតរងរបួសធ្ងន់ និងស្រាល ដែលកំពុងសម្រាកព្យាបាលនៅមន្ទីរពេទ្យ។ នេះបើតាមការចេញ​ផ្សាយនៅមុននេះបន្តិច ដោយទីភ្នាក់ងារព័ត៌មានចិនស៊ិនហួរ នាព្រឹកថ្ងៃអង្គារ ទី៣០ ខែឧសភា ឆ្នាំ២០១៧។

កាលពីយប់ថ្ងៃចន្ទ អភិបាលក្រុងម៉ូស្គូ លោក Sergei Sobyanin បានបញ្ជាក់ថា ព្យុះកំណាចនេះក៏បាន បណ្តាលឲ្យមាន​ការដួលរំលំដើមឈើ​ នៅ​តាមដងវិថីជាច្រើន ដែលជាហេតុបង្កើត​ជាការរាំងស្ទះដល់ចរាចណ៍​ធ្វើដំណើរ និងថែមទាំងបាន​បង្កការខូចខាត​ដល់អគារមួយចំនួន នៅ​ក្នុងទីក្រុង​ទៀតផង។

គួរបញ្ជាក់ថា ព្យុះកំណាចខាងលើនេះមានល្បឿន ៨០គីឡូម៉ែត្រក្នុងមួយម៉ោង ដោយវាបានបំផ្លាញអគារ​នានាជាច្រើនក្នុងទីក្រុង និងធ្វើដើមឈើរាប់រយដើមបាក់រលំ។ បន្ថែមពីនេះខ្សែចម្លងអគ្គិសនីជាច្រើនបានដាច់ ដែលបង្កឲ្យផ្ទះសម្បែងប្រជាជនជាង ៧,៣០០ខ្នងរងផលប៉ះពាល់៕