(ប៊ែរឡាំង)៖ ដោយមិននិយាយចំឈ្មោះសហរដ្ឋអាមេរិក អធិការបតីអាល្លឺម៉ង់ លោក អាន់ជែឡា មឺគែល បាននិយាយថា អឺរ៉ុបមិនអាចពឹងផ្អែកទំាងស្រុងលើសម្ព័ន្ធមិត្តមួយនេះទៀតនោះទេ ហើយត្រូវតែកំណត់ជោគវាសនានៅក្នុងដៃរបស់ខ្លួងឯង ប៉ុន្តែលោកស្រីបញ្ជាក់ថា ចំណងមិត្តភាពជាមួយអាមេរិកនៅតែល្អ ហើយជាមួយប្រទេសរុស្ស៊ី អាល្លឺម៉ង់ក៏អាចធ្វើបានដូចគ្នា។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅព្រឹកថ្ងៃចន្ទ ទី២៩ ខែឧសភា ឆ្នាំ២០១៧។
ការថ្លែងបែបនេះរបស់លោកស្រី មឺគែល ធ្វើឡើងបន្ទាប់ពីប្រធានាធិបតីអាមេរិក លោក ដូណាល់ ត្រាំ បានរិះគន់លើសម្ព័ន្ធមិត្តអង្គការណាតូ ដូចជាអាល្លឺម៉ង់ព្រមទាំងបានបដិសេធទទួលយកកិច្ចព្រមព្រៀង ស្ដីពីបម្រែបម្រួលអាកាសធាតុពិភពលោកក្នុងទីក្រុងប៉ារីស។ ជាមួយគ្នានោះដែរ លោកស្រី មឺគែល បានគូសបញ្ជាក់យ៉ាងដូច្នេះថា «ខ្ញុំបានទទួលយកបទពិសោធន៍ទំាងនេះ កាលពីប៉ុន្មានថ្ងៃមុន ហើយអ្វីដែលខ្ញុំអាចនិយាយបាននោះ គឺអឺរ៉ុបត្រូវតែក្តោបក្ដាប់ និងកំណត់ជោគវាសនារបស់ខ្លួនដោយខ្លួនឯង ... ជាការពិតទំនាក់ទំនងមិត្តភាពជាមួយសហរដ្ឋអាមេរិក អង់គ្លេស ក្នុងនាមជាអ្នកជិតខាងល្អអាចបន្តធ្វើទៅបាន ដូច្នេះទំនាក់ទំនងមិត្តភាពជាមួយបណ្ដាប្រទេសដទៃ ទោះបីជារុស្ស៊ីក៏ដោយក៏អាចធ្វើបានដូចគ្នា»។
គួររំលឹកថា នៅអំឡុងកិច្ចប្រជុំ G7 រយៈពេល០២ថ្ងៃ លោក ដូណាល់ ត្រាំ មានការខ្វែងគំនិតគ្នាមួយចំនួននឹងថ្នាក់ដឹកនាំប្រទេសអាល្លឺម៉ង់ បារាំង អង់គ្លេស អ៊ីតាលី ជប៉ុន និងកាណាដា ជាពិសេសគឺការបដិសេធទទួលយកកិច្ចព្រមព្រៀង ស្ដីពីបម្រែបម្រួលអាកាសធាតុពិភពលោក ក្នុងទីក្រុង ប៉ារីស។ ក៏ប៉ុន្តែប្រធានក្រុមប្រឹក្សាអឺរ៉ុប លោក ដូណាល់ ថាស បែរជានិយាយថា លោក មានសុទិដ្ឋិនិយមច្រើន ក្រោយជួបពិភាក្សាជាមួយ លោក ដូណាល់ ត្រាំ ក្នុងទីក្រុងព្រុចសែលកាលពីសប្ដាហ៍មុនទៅវិញ៕
