(សេអ៊ូល)៖ ប្រទេសជប៉ុន និងកូរ៉េខាងត្បូងនៅថ្ងៃចន្ទនេះ បានចេញសេចក្តីថ្លែងការណ៍ថ្កោលទោសកម្រិតធ្ងន់ដូចៗគ្នាទៅលើសកម្មភាពគគ្លើនជាថ្មីរបស់កូរ៉េខាងជើង ដោយការបាញ់មីស៊ីលផ្លោងមួយគ្រាប់ធ្លាក់ចូលទៅក្នុងដែនទឹកសេដ្ឋកិច្ចផ្តាច់មុខរបស់ប្រទេសជប៉ុន នៅក្នុងដែនសមុទ្រជប៉ុន។ នេះបើតាមការចេញផ្សាយនៅមុននេះបន្តិច ដោយទីភ្នាក់ងារព័ត៌មានចិនស៊ិនហួរ នាព្រឹកថ្ងៃចន្ទ ទី២៩ ខែឧសភា ឆ្នាំ២០១៧។
នាយករដ្ឋមន្ត្រីជប៉ុនលោក ស៊ីនហ្សូ អាបេ បានប្រាប់អ្នកសារព័ត៌មាននានាក្នុងទីក្រុងតូក្យូថា «យើងមិនអាចទ្រាំបានទៀតទេ ចំពោះទង្វើបង្កហេតុដដែលៗនេះ ដែលវាពិតណាស់ជាការបំពានការព្រមានម្តងហើយម្តងទៀត របស់អន្តរជាតិ»។ ជប៉ុនបានប្តេជ្ញាថា នឹងធ្វើកិច្ចសហប្រតិបត្តិការជាមួយអន្តរជាតិ ជាពិសេស អាមេរិក និងកូរ៉េខាងត្បូង ដើម្បីឆ្លើយតបនឹងទង្វើដ៏គគ្លើនរបស់កូរ៉េខាងជើង។
ដោយឡែករដ្ឋាភិបាលកូរ៉េខាងត្បូងវិញក៏មិនខុសគ្នាដែរ ដោយទីក្រុងសេអ៊ូលបានចេញសេចក្តីថ្លែងការណ៍ថ្កោលទោសការបាញ់សាកល្បងមីស៊ីលផ្លោងមួយគ្រាប់ នៅព្រឹកថ្ងៃចន្ទនេះ ចេញពីតំបន់ឆ្នេរភាគខាងកើតរបស់ខ្លួន ដែលនេះគឺជាសញ្ញាណថ្មីមួយអាចបំផ្លាញដល់ កិច្ចខិតខំប្រឹងប្រែងនៃរដ្ឋាភិបាលកូរ៉េខាងត្បូង ក្នុងការធ្វើឱ្យប្រសើរឡើងវិញនូវទំនាក់ទំនងអន្តរកូរ៉េ។
យោងតាមយោធាកូរ៉េខាងត្បូង គ្រាប់មីស៊ីលនេះអាចជាប្រភេទមីស៊ីល Scud ត្រូវបានបាញ់នៅម៉ោងប្រមាណ ៥៖៣៩នាទីព្រឹក ចេញពីតំបន់ Wonsan នៃខេត្ត Kangwon មុនធ្លាក់ ចូលក្នុងសមុទ្រជប៉ុន ហើយវាអាចហោះបានចំងាយ ៤៥០គីឡូម៉ែត្រ។ ក៏ប៉ុន្តែយោធាកូរ៉េខាងត្បូង មិនទាន់បញ្ជាក់លម្អិតអ្វីបន្ថែមនោះទេ ដោយគ្រាន់តែនិយាយថា ទីក្រុងសេអ៊ូល និងទីក្រុងវ៉ាស៊ីនតោន កំពុងធ្វើការវិភាគលើគ្រាប់មីស៊ីលនេះ។
គួរបញ្ជាក់ថា នេះគឺជាលើកទី០៩ដែលកូរ៉េខាងជើងបាញ់សាកល្បងមីស៊ីលផ្លោង គិតចាប់តំាងពីដើមឆ្នាំ២០១៧មក។ ម្យ៉ាងវិញទៀតការធ្វើតេស្ដនេះ ធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីមេដឹកនាំ G7 ចាត់ទុកថា ការធ្វើតេស្ដអាវុធនុយក្លេអ៊ែរ និងមីស៊ីលផ្លោងរបស់កូរ៉េខាងជើង គឺជា ការគម្រាមកំហែងយ៉ាងធ្ងន់ធ្ងរ ហើយបានព្រមានថា នឹងចាត់ធានការយ៉ាងតឹងរ៉ឹង ដើម្បីដោះស្រាយជាមួយទីក្រុងព្យុងយ៉ាង ខណៈសហរដ្ឋអាមេរិក សម្រេចចិត្តបញ្ជូននាវាផ្ទុកយន្ដហោះចម្បាំងទីបី មកកាន់តំបន់ប៉ាស៊ីហ្វិកខាងលិច៕
