(សេអ៊ូល)៖ ស្ថាប័នព័ត៌មានរដ្ឋកូរ៉េខាងជើង បានអះអាងនៅថ្ងៃសៅរ៍នេះថា យន្តហោះគ្មានអ្នកបើកបរ (Drone) របស់យោធាកូរ៉េខាងត្បូង បានបំពានចូលដែនអាកាសរបស់ខ្លួននាសប្តាហ៍នេះ ហើយបានចាត់ទុកទង្វើនេះថា ជាសកម្មភាពបង្កហេតុយោធាដ៏អាក្រក់មួយ។ នេះបើតាមការចេញផ្សាយដោយទីភ្នាក់ងារព័ត៌មានកូរ៉េខាងត្បូង យុនហ៉ាប់ នៅរសៀលថ្ងៃសៅរ៍ ទី២៧ ខែឧសភា ឆ្នាំ២០១៧។
ទីភ្នាក់ងារព័ត៌មានរដ្ឋាភិបាលកូរ៉េខាងជើង (KCNA) បានធ្វើសេចក្តីរាយការណ៍ថា យន្តហោះ Drone ស៊ើបការណ៍របស់កូរ៉េខាងត្បូងមានឈ្មោះថា Heron បានធ្វើការហោះហើរនៅលើតំបន់ភាគលិចព្រំដែនរបស់ខ្លួន ចំនួនបួនលើក ចន្លោះម៉ោង ៧៖៤៦នាទីព្រឹក ដល់ម៉ោង ៨៖៤០នាទីយប់ ថ្ងៃសុក្រម្សិលមិញនេះ។
KCNA បានបន្តថា ការរំលោភបំពានដែនអាកាសនេះមានកម្រិតធ្ងន់ធ្ងរខ្លាំង ស្របពេលដែលវាបានកើតឡើងចំពេលសហរដ្ឋអាមេរិក បានបញ្ជូនយន្តហោះ Drone ស៊ើបការណ៍យក្ស Global Hawk និងពលទាហានប្រមាណ ១០០នាក់ទៀត ទៅកាន់មូលដ្ឋានទ័ពអាកាស Yokoda នៃប្រទេសជប៉ុន ពីមូលដ្ឋានយោធារបស់ពួកគេនៅឯកោះហ្គាំ ដោយយកលែសថា ជាភៀសខ្លួនពីការវាយប្រហាររបស់ខ្យល់ព្យុះទីហ្វុងដ៏អាក្រក់មួយ។ ជាមួយគ្នានេះកូរ៉េខាងជើង ក៏បានទម្លាក់កំហុសលើកូរ៉េខាងត្បូង សម្រាប់ការដុតរោលភាពតានតឹងផ្នែកយោធាផងដែរ និងបានព្រមានអំពីការឆ្លើយតបសងសឹកទៅវិញ ដោយឥតក្តីមេត្តាឡើយ។
គួរបញ្ជាក់ថា កាលពីអំឡុងពេលប៉ុន្មានសប្តាហ៍កន្លងទៅនេះ របបដឹកនាំទីក្រុងព្យុងយ៉ាងបានបង្កើនភាពតានតឹងផ្នែកយោធា តាមរយៈការធ្វើតេស្តមីស៊ីលផ្លោងបន្តបន្ទាប់គ្នា ដែលអ្នកវិភាគជាច្រើនបានអះអាងថា គឺជាតំរុយស្តែងឲ្យឃើញពីការរីកចម្រើនយ៉ាងខ្លាំងក្លា របស់កូរ៉េខាងជើង ឈានទៅរកការអភិវឌ្ឍមីស៊ីលផ្លោងរយៈចម្ងាយឆ្ងាយ ដែលមានសមត្ថភាពវាយប្រហារដល់សហរដ្ឋអាមេរិក៕
