(ប៉េកាំង)៖ ប្រធានាធិបតីចិន លោក ស៊ី ជិងពីង នាពេលថ្មីៗនេះបានអំពាវឲ្យមានការខិតខំប្រឹងប្រែង កសាងកងទ័ពជើងទឹកចិន ឲ្យក្លាយទៅជាកងកម្លាំងដ៏មានឥទ្ធិពល និងទំនើបមួយនៅពិភពលោក។ នេះបើតាមការចេញផ្សាយដោយសារព័ត៌មាន CGTN នៅព្រឹកថ្ងៃព្រហស្បតិ៍ ទី២៥ ខែឧសភា ឆ្នាំ២០១៧។
លោក ស៊ី ដែលមានតួនាទីជាអគ្គលេខាធិការ នៃគណៈកម្មាធិការមជ្ឈិមបក្សកុម្មុយនិស្តចិន និងជាប្រធានគណៈកម្មការយោធាមជ្ឈិមផងដែរនោះ បានធ្វើការលើកឡើងបែបនេះកាលពីថ្ងៃពុធម្សិលមិញ ក្នុងអំឡុងការធ្វើអធិការកិច្ច ទៅលើបណ្តាទីស្នាក់ការនៃកងយោធាជើងទឹករបស់ប្រទេសចិន។
បន្ទាប់ពីបានទទួលស្តាប់របាយការណ៍ទាក់ទិននឹង ការបំពេញការងាររបស់កម្លាំងយោធាជើងទឹក លោក ស៊ី ជិនពីង បានថ្លែងថា វិស័យយោធាជើងទឹកដ៏ខ្លាំងក្លាមួយ គឺជានិមិត្តរូបដ៏សំខាន់នៃកងទ័ពលំដាប់ថ្នាក់ពិភពលោក និងជាកត្តាមិនអាចខ្វះបានមួយសម្រាប់ការកសាងប្រជាជាតិចិន ឲ្យក្លាយទៅជាមហាអំណាចជើងទឹកដ៏អស្ចារ្យមួយនៅលើពិភពលោក។
គួរបញ្ជាក់ថា នាឱកាសនោះដែរលោកប្រធានាធិបតីចិន ក៏បានឆ្លៀតឱកាសថ្លែងអំណរអរគុណ ចំពោះកិច្ចខិតខំប្រឹងប្រែងការពារជាតិ របស់ពលទាហានផងដែរ។ ប្រទេសចិន គឺជាមហាអំណាចសេដ្ឋកិច្ចលេខ២ នៅលើពិភពលោក ប៉ុន្តែងាកមកមើលវិស័យយោធាវិញ គឺខ្លួននៅស្ថិតក្នុងគម្លាតឆ្ងាយពីអាមេរិក និងរុស្ស៊ីនៅឡើយ ជាពិសេសទៅបច្ចេកវិទ្យាទំនើបៗ ដែលបំពាក់ឲ្យកងកម្លាំងរបស់ខ្លួនប្រើប្រាស់៕
