(ឡុងដ៍)៖ នាយករដ្ឋមន្រ្តីអង់គ្លេស​ លោកស្រី Theresa May កំពុងគ្រោងរៀបចំ​នឹងធ្វើការសង្ខេប​ដំណើរទស្សនកិច្ច​របស់លោក​ស្រី នៅឯទីក្រុង Sicily នៃប្រទេសអ៊ីតាលី ដើម្បីចូលរួមកិច្ចប្រជុំ G7 បន្ទាប់ពីកម្រិត​នៃការគំរាមកំហែង​ដោយអំពើភេរវកម្ម ​ត្រូវបានបង្កើន​នៅក្នុងចក្រភព​អង់គ្លេស​ដល់កម្រិត​ធ្ងន់ធ្ងរ​បំផុត ក្រោយករណីបំផ្ទុះគ្រាប់បែក​អត្តឃាតនៅ​ក្នុងទីក្រុង Manchester សម្លាប់មនុស្ស ២២នាក់ និងបង្ករបួស៥៩នាក់។ នេះ​បើតាម​ការចេញផ្សាយដោយ​ទីភ្នាក់ងារព័ត៌មាន Reuters នៅព្រឹកថ្ងៃព្រហស្បតិ៍ ទី២៥ ខែឧសភា ឆ្នាំ២០១៧។

យោងតាមប្រភពព័ត៌មាន​ពី មន្រ្តីជាន់ខ្ពស់រដ្ឋាភិបាល​អង់គ្លេសមួយរូប ពីដំបូងឡើយលោកស្រី Theresa May បានតម្រូវឲ្យចូលរួមកិច្ចប្រជុំ​​ នៃបណ្តាប្រជាជាតិ​ដែលឈានមុខគេខាង​វិស័យឧស្សាហកម្មនេះ រហូតដល់ចុងបញ្ចប់​នៃកិច្ចបិទកម្មវិធី នាថ្ងៃសៅរ៍សប្តាហ៍នេះ ក៏ប៉ុន្តែឥឡូវនេះ លោកស្រី May ក៏បានសម្រេចចិត្ត​ថា លោកស្រីគ្រោងនឹងចាកចេញមកអង់គ្លេសវិញ ក្រោយចូលរួមកិច្ចប្រជុំបានមួយថ្ងៃ។

មន្រ្តីខាងលើបានថ្លែង​ឲ្យដឹងយ៉ាងដូច្នេះថា «ដោយយោងទៅតាមធាតុពិត​ជាក់ស្តែងដែលថា យើងមានកម្រិត​គំរាមកំហែង​ ដែល​បច្ចុប្បន្ននេះកំពុង​ស្ថិតក្នុងស្ថានភាព​ដ៏ធ្ងន់ធ្ងរ ហើយបូករួមទាំង​ស្ថានការណ៍​ ដែលកំពុងវិវឌ្ឍន៍​ទៅមុខថែមទៀតនោះ លោកស្រី​​នាយករដ្ឋមន្រ្តី កំពុងគ្រោងនឹង​ពន្លឿនកម្មវិធីរបស់លោកស្រី នៅឯកិច្ចប្រជុំ G7 និងទំនង​ជាវិលត្រឡប់​មកកាន់ចក្រភពអង់គ្លេស​​វិញ នាល្ងាចថ្ងៃសុក្រ​សប្តាហ៍នេះ»។

គួរបញ្ជាក់ថា កាលពីថ្ងៃចន្ទដើមសប្តាហ៍នេះ (ម៉ោងក្នុងទីក្រុង Manchester) មានករណីវាយប្រហារ​ដោយបំផ្ទុះគ្រាប់បែក​អត្ត​ឃាតមួយ ដែលជាស្នាដៃ​ដ៏ខ្មៅងងឹតរបស់​ក្រុមភេរវករ ISIS បានកើតឡើង​នៅកន្លែង​ប្រគុំតន្រ្តី Manchester Arena នៃទីក្រុង Manchester របស់​ចក្រ​ភព​​អង់​គ្លេស។ ហេតុ​ការណ៍​​ដ៏រន្ធត់នេះ បានឆក់យកជីវិតមនុស្ស​ចំនួន​ ២២នាក់ ដែលភាគច្រើន​ជាកុមារ និង៥៩នាក់​ផ្សេងទៀត​បានទទួលរបួសធ្ងន់​ និងស្រាល។ ដោយឡែក​មកទល់ព្រឹក​ថ្ងៃព្រហស្បតិ៍នេះ ប៉ូលិសអង់គ្លេស​បានធ្វើ​ការ​ចាប់ខ្លួន​ ជនសង្ស័យ​ចំនួន០៧នាក់ហើយ ជុំវិញអំពើភេរវកម្មដ៏អាក្រក់បំផុត ដែលអង់គ្លេស​ពុំដែលធ្លាប់បាន​ជួបប្រទះនេះ៕