(អង់គ្លេស)៖ ទីបំផុតកងកម្លាំងប៉ូលិសអង់គ្លេសបានចាប់ជនសង្ស័យ ជាបុរសចំនួនបីនាក់បន្ថែមទៀត និងបញ្ជូនទៅត្រៀមធ្វើការសួរចម្លើយ ក្រោយអំពើភេរវកម្មដោយការបំផ្ទុះគ្រាប់បែកអត្តឃាត កើតមានឡើងក្នុងទីក្រុងធំទីពីរ Manchester របស់អង់គ្លេសកាលពីយប់ថ្ងៃចន្ទ ដែលបានបណ្តាលឲ្យមនុស្សក្មេងចាស់ប្រុសស្រី ២២នាក់បាត់បង់ជីវិត​ក្នុងថ្លុកឈាម និង៥៩នាក់ទៀតរងរបួស។ នេះបើតាមការចេញផ្សាយនៅមុននេះបន្តិចដោយ សារព័ត៌មាន BBC នៅល្ងាចថ្ងៃពុធ ទី២៤ ខែឧសភា ឆ្នាំ២០១៧។

កាលពីម្សិលមិញ បុរសម្នាក់វ័យ២៣ឆ្នាំ ក៏ត្រូវបានប៉ូលិសចាប់ខ្លួនផងដែរ សរុបទាំងអស់ជនសង្ស័យចំនួន៤ហើយ ត្រូវបានចាប់ខ្លួន។

បើតាមប៉ូលិស​អង់គ្លេសបញ្ជាក់កាលពីព្រឹកថ្ងៃពុធនេះថា ជនសង្ស័យបំផ្ទុះគ្រាប់បែក​អត្តឃាត នៅសាល​ប្រគុំតន្រ្តី Manchester Arena ក្នុងទីក្រុង Manchester មានឈ្មោះថា Salman Abedi អាយុ២២ឆ្នាំ និងមានម្ដាយ​ឪពុកជាជនភៀស​ខ្លួនមកពីប្រទេសលីប៊ី។ ចំណែកឯក្រុម ISIS តាមរយៈ ប្រព័ន្ធផ្សព្វផ្សាយ​ឈ្មោះ Amaq ក៏បានអះអាង​ដែរថា ជនបំផ្ទុះគ្រាប់បែក អត្តឃាតរូបនេះ​គឺជាអ្នកប្រយុទ្ធ​របស់ពួកគេ។

គួរបញ្ជាក់ថា នាយករដ្ឋមន្ត្រីអង់គ្លេស លោកស្រី Theresa May បានប្រកាសកាលពីល្ងាចថ្ងៃអង្គារថា កម្រិតប្រកាសអាសន្ន​នៃសកម្មភាពភេរវកម្ម​នៅក្នុងប្រទេស​ បានកើនឡើងខ្ពស់​គួរឱ្យព្រួយបារម្ភ​ជាទីបំផុត ខណៈដែលកងកម្លាំងទាហានត្រូវតែ​ធ្វើការដាក់ពង្រាយ ដើម្បីការពារសន្តិសុខក្នុងព្រឹត្តិការណ៍សំខាន់ៗ បន្ថែមពីលើកងកម្លាំងប៉ូលិសដែលមានស្រាប់។ ប៉ូលិសអង់គ្លេសជឿជាក់ថា ជនបំផ្ទុះអត្តឃាតប្រាកដជា​មានបក្ខពួក ដែលជួយដល់ការប្រព្រឹត្តអំពើភេរវកម្មនេះជាមិនខាន៕