(ញូដេលី)៖ យោធាប្រទេសឥណ្ឌា​នាថ្ងៃពុធនេះ បានបន្តបង្កើនប្រតិបត្តិការ​យ៉ាងស្វិតស្វាញ ដើម្បីតាមស្វែងរក​ដានរបស់យន្តហោះ​​​ចម្បាំងធុន Sukhoi-30 MKI មួយគ្រឿងដែល​បានបាត់ដំណឹង​សូន្យឈឹង រួមជាមួយ​និងអាកាសយានិកចំនួនពីររូបនៅលើនោះ​​។ នេះបើតាម​ការចេញផ្សាយ​ដោយ​ទីភ្នាក់ងារចិន ស៊ិនហួរ នៅរសៀល​ថ្ងៃពុធ ទី២៤ ខែឧសភា ឆ្នាំ២០១៧។

ស្របពេល​នៃការតាមរុករកបាន និងកំពុងឈានចូលដល់​ថ្ងៃទីពីរ​ហើយនោះ ក្រុមភ្នាក់ងារជួយ​សង្រ្គោះពុំទាន់អាច​រកឃើញ​យន្ត​ហោះចម្បាំង ដែលកំពុងបាត់ខ្លួន​នៅឡើយទេ​មកទល់រសៀលថ្ងៃពុធនេះ បន្ទាប់ពីយន្តហោះ​ចម្បាំងធុន Sukhoi-30 MKI របស់កង​ទ័ពអាកាស​ឥណ្ឌាមួយគ្រឿង បានដាច់ការ​ទាក់ទងកាលពី​ថ្ងៃអង្គារសប្តាហ៍នេះ ក្រោយពីបានហោះហើរ​ចាកចេញពីមូលដ្ឋានទ័ព​​អាកាស Tezpur ដែលស្ថិតនៅ​ក្នុងរដ្ឋ Assam ភាគឦសាន​ប្រទេស ដើម្បីធ្វើ​ការហ្វឹកហ្វឺន។

គួរបញ្ជាក់ថា កាលពីខែមីនា ឆ្នាំ២០១៧នេះ យន្តហោះចម្បាំង Sukhoi មួយគ្រឿងបានធ្លាក់នៅក្នុងទីក្រុង Barmer នៃរដ្ឋ Rajasthan ហើយបើគិតចាប់តាំងពីការ​ប្រើប្រាស់​យន្តហោះចម្បាំងធុន Sukhoi-30 ដែលជាប្រភេទយន្តហោះល្បឿនលឿន​ជាងសំឡេង មាន​ម៉ាស៊ីនពីរផលិតឡើងដោយរុស្ស៊ី នៅក្នុងជួរកងទ័ព​ជើងអាកាស​ឥណ្ឌាកាលពីឆ្នាំ១៩៩៧មក យន្តហោះធុននេះ​សរុបចំនួន​​០៧គ្រឿង​ហើយ បានធ្លាក់៕