(រ៉ូម)៖ ប្រធានាធិបតីអាមេរិក លោក ដូណាល់ ត្រាំ បានជួបជាមួយ​សម្ដេច ប៉ាប ហ្រ្វង់ស៊ីស ហើយ នៅថ្ងៃពុធនេះនាបុរីវ៉ាទីកង់ ក្នុងជំនួបឯកជនដ៏ខ្លីមួយដែលមានរយៈពេលប្រហែលជា ២០នាទី នាឱកាសបំពេញ​ដំណើរទស្សនកិច្ច​មកកាន់ទ្វីបអឺរ៉ុប ក្រោយបញ្ចប់ទស្សនកិច្ច​នៅមជ្ឈិមបូព៌ា។ នេះបើតាមការ​ចេញផ្សាយដោយ​សារព័ត៌មាន BBC​ នៅរសៀលថ្ងៃពុធ ទី២៤ ខែឧសភា ឆ្នាំ២០១៧។

លោក ដូណាល់ ត្រាំ បានមកដល់​អាកាសយានដ្ឋាន ឡេអូណាដ ឌឺ វំាងស៊ី (Leonard-de-Vinci) ក្នុងទីក្រុងរ៉ូម​កាលពីថ្ងៃអង្គារ។ ដោយឡែកបើ​តាមកាលវិភាគ ប្រធានាធិបតី​អាមេរិករូបនេះ នឹងត្រូវចំណាយ​ពេល ២៤ម៉ោង ស្ថិតនៅក្នុង​ប្រទេសអ៊ីតាលី មុននឹងបន្ត​ដំណើរទៅកាន់ទីក្រុង​ព្រុចសែល ដើម្បីចូលរួមកិច្ចប្រជុំ​អង្គការណាតូ ព្រមទំាងជួបពិភាក្សា​នឹងថ្នាក់ដឹកនាំអឺរ៉ុបនានា។

ចំពោះអ្វីដែលគេកំពុងទន្ទឹមរង់ចាំ​មើល​នៅក្នុងជំនួប​នេះ លោក ត្រាំ នឹងនិយាយអ្វីខ្លះ​ទៅកាន់សម្ដេច ប៉ាប ហ្រ្វង់ស៊ីស បន្ទាប់ពី​អ្នកទំាងពីរធ្លាប់​បានតឹងសសៃកដាក់គ្នា ដោយសារតែ​គោលនយោបាយ​ជនភៀសខ្លួន របស់លោក ត្រាំ ជាពិសេសគឺ​ការសាងសង់ ជញ្ជំាងព្រំដែន​ជាមួយមិចស៊ីកូតែម្ដង ដោយសម្ដេច ប៉ាប ធ្លាប់បានរិះគន់យ៉ាងខ្លាំងលើគំរោង​ទំាងនេះ ហើយថែមទំាង​ចាត់ទុកថា អ្នកដែលចេះតែ​សាងសង់ជញ្ជាំង និងរបងដូចជាលោក ត្រាំ មិនមែនជា​អ្នកកាន់សាសនាគ្រិស្ដឡើយ រីឯលោក ត្រាំ វិញក៏បានចាត់ទុកថា សម្ដេច ប៉ាប ជាអ្នកនយោបាយ​មួយរូបផងដែរ។   

គួរបញ្ជាក់ថា ក្រោយបញ្ចប់​ដំណើរសំចតនៅទីក្រុងព្រុចសែល លោក ដូណាល់ ត្រាំ នឹងជិះយន្ដហោះ​មកអ៊ីតាលីជាថ្មី​សម្រាប់កិច្ចប្រជុំ G7៕