(​សេអ៊ូល)៖ ក្រសួងការពារជាតិ​កូរ៉េខាងត្បូង​បាននិយាយថា វត្ថុចម្លែកម្យ៉ាង​ដែលហោះចេញពី​កូរ៉េខាងជើង ចូលមកក្នុងទឹកដី​កូរ៉េខាងត្បូង គ្រាន់តែជាប៉េងប៉ោងហោះ​តែប៉ុណ្ណោះ បន្ទាប់ពីយោធារបស់ខ្លួន បានចំណាយគ្រាប់កំាភ្លើង​យន្ដ​ជិត ៩០គ្រាប់ បាញ់ព្រមាន ប៉េងប៉ោងហោះ​ទាំងនេះ។ នេះបើតាមការចេញ​ផ្សាយដោយ សារព័តមាន Channel News Asia នៅព្រឹកថ្ងៃពុធ ទី២៤ ខែឧសភា ឆ្នាំ២០១៧។​

យោងតាមយោធា​កូរ៉េខាងត្បូង កាលពីដំបូង​ឡើយ​វត្ថុចម្លែកខាងលើ​ត្រូវបានសង្ស័យថា ជាយន្ដហោះដ្រូន បានហោះឆ្លងកាត់​ព្រំដែន​ចូលមកក្នុង ទឹកដី​កូរ៉េខាងត្បូងនៃតំបន់ Chorwon ស្ថិតនៅក្នុង​ខេត្ត Gangwon នៅម៉ោងប្រមាណ ៤៖០០នាទីរសៀលថ្ងៃអង្គារ ហើយព្រមពេល​ជាមួយគ្នា ពួកគេបានបាញ់​កាំភ្លើងយន្ដធុន K-3 ជាង​៩០គ្រាប់ជាការព្រមាន។

ជុំវិញបញ្ហាខាងលើ ថ្លែងនៅក្នុងសន្និសីទសារព័ត៌មាននៅថ្ងៃពុធនេះ អ្នកនាំពាក្យក្រសួង​ការពារជាតិ​កូរ៉េខាងត្បូង លោក Moon Sang-gyun បានគូសបញ្ជាក់​យ៉ាងដូច្នេះថា «វាមាន​លទ្ធភាព​តិចតួចណាស់ថា វត្ថុចម្លែកនោះ​គឺជា​យន្ដហោះដ្រូន (...) ពោលគឺបន្ទាប់ពី​ការវិភាគ យើងបានសន្និដ្ឋាន​ចុងក្រោយថា វាគ្រាន់តែ​ជាប៉េងប៉ោង ចែកចាយខិតប័ណ្ណរបស់កូរ៉េខាងជើង​តែប៉ុណ្ណោះ»។

គួររំលឹកថា កាលពីខែមករា​កន្លងទៅ យន្ដហោះដ្រូន​របស់កូរ៉េខាងជើងបានហោះចូលមកក្នុងទឹកដី​កូរ៉េខាងត្បូង ហើយកងទ័ព​កូរ៉េខាងត្បូង ក៏បានបាញ់ព្រមាន​ដូចគ្នានេះផងដែរ៕