(ឡុងដ៍)៖ បន្ទាប់ពីមានការវាយប្រហារភេរវកម្មដោយបំផ្ទុះគ្រាប់បែកអត្តឃាត សម្លាប់មនុស្ស២២នាក់ និងបង្ករបួសជាង៥៩នាក់ នៅឯទីក្រុង Manchester នាយករដ្ឋមន្ត្រីអង់គ្លេស លោកស្រី Theresa May បានប្រកាសកាលពីល្ងាចថ្ងៃអង្គារថា កម្រិតប្រកាសអាសន្ននៃសកម្មភាពភេរវកម្មនៅក្នុងប្រទេស បានកើនឡើងខ្ពស់គួរឱ្យព្រួយបារម្ភជាទីបំផុត ខណៈដែលកងកម្លាំងទាហានត្រូវតែធ្វើការដាក់ពង្រាយ ដើម្បីការពារសន្តិសុខក្នុងព្រឹត្តិការណ៍សំខាន់ៗ បន្ថែមពីលើកងកម្លាំងប៉ូលិសដែលមានស្រាប់។ នេះបើតាមការចេញផ្សាយដោយសារព័ត៌មាន BBC នៅព្រឹកថ្ងៃពុធ ទី២៤ ខែឧសភា ឆ្នាំ២០១៧។
ជាមួយគ្នានោះដែរ លោកស្រីនាយករដ្ឋមន្ត្រីបានបញ្ជាក់ទៀតថា ដោយសារតែការព្រួយបារម្ភនេះ កងទ័ពនឹងត្រូវបានដាក់ពងា្រយ ជាពិសេសនៅក្នុងឱកាសនៃព្រឹត្តិការណ៍ប្រកួតកីឡាតែម្ដង ដើម្បីជួយគ្រាំទ្រដល់អាជ្ញាធរប៉ូលិស ក្នុងការទប់ស្កាត់សកម្មភាពភេរវកម្ម កុំឱ្យកើតឡើងជាថ្មីម្ដងទៀត។ «វាមិនមែនជារឿងដែលមិនអាចទៅរួចឡើយដែលថា សកម្មភាពវាយប្រហារភេរវកម្មផ្សេងទៀត នឹងកើតឡើងនៅពេលដ៏ខ្លីខាងមុខនេះ»។ នេះជាសម្ដីលោកស្រី Theresa May។
គួរបញ្ជាក់ថា បើតាមប៉ូលិសអង់គ្លេស ជនសង្ស័យបំផ្ទុះគ្រាប់បែកអត្តឃាត នៅសាលប្រគុំតន្រ្តី Manchester Arena ក្នុងទីក្រុង Manchester មានឈ្មោះថា Salman Abedi អាយុ២២ឆ្នាំ និងមានម្ដាយឪពុកជាជនភៀសខ្លួនមកពីប្រទេសលីប៊ី។ ចំណែកឯក្រុម ISIS តាមរយៈ ប្រព័ន្ធផ្សព្វផ្សាយឈ្មោះ Amaq ក៏បានអះអាងដែរថា ជនបំផ្ទុះគ្រាប់បែក អត្តឃាតរូបនេះគឺជាអ្នកប្រយុទ្ធរបស់ពួកវា៕
