(ឡុងដ៏)៖ ប៉ូលិសអង់គ្លេសអះអាងថា ក្នុងករណីភេរវកម្មបំផ្ទុះគ្រាប់បែក​នៅអង់គ្លេស អ្នកស្លាប់ភាគច្រើនជាកុមារ ខណៈចំនួនអ្នកស្លាប់នៅក្នុងការវាយប្រហារបំផ្ទុះគ្រាប់បែក នៅកន្លែងប្រគុំតន្រ្តី Manchester Arena ស្ថិតភាគ​ពាយ័ព្យនៃប្រទេស អង់គ្លេសកាលពីថ្ងៃចន្ទ បានកើនដល់២២នាក់ហើយ ខណៈ មនុស្ស​៥៩នាក់ផ្សេងទៀតនោះបានរងរបួស។ នេះបើតាមការចេញផ្សាយ Update ដោយសារព័ត៌មាន Sky News នៅមុននេះបន្តិចនារសៀលថ្ងៃអង្គារ ទី២៣ ខែឧសភា ឆ្នាំ២០១៧។

​យោងតាមអាជ្ញាធរ​អង់គ្លេស ការវាយប្រហារនេះត្រូវបានធ្វើឡើងដោយជន​បំផ្ទុះគ្រាប់បែកអត្តឃាត ជាបុរសម្នាក់ ដែលបានបង្កៃគ្រាប់បែកជាប់ខ្លួន រីឯនាយករដ្ឋមន្ត្រីអង់គ្លេស​ក៏បានថ្កោល ទោសយ៉ាងខ្លំាងចំពោះ​ការវាយប្រហារដ៏អាក្រក់​នេះដែរ មិនតែប៉ុណ្ណោះលោកស្រីក៏បានលុបចោល ការធ្វើយុទ្ធនាការឃោសនាបោះឆ្នោតជា បណ្ដោះអាសន្នទៀតផង។ មួយវិញទៀត ភ្លាមៗពុំទាន់​មានក្រុមណាមួយ​ចេញទទួលខុសត្រូវនៅឡើយទេ ក៏ប៉ុន្តែមួយរយៈពេលចុងក្រោយ ក្រុម ISIS តែងតែដឹកនាំសកម្មភាពវាយប្រហារភេរវកម្មនៅអឺរ៉ុប។​

ប៉ូលិសប្រចាំទីក្រុង Manchester ដែលជាទីក្រុងដ៏ធំបំផុតទីពីររបស់អង់គ្លេសបានឲ្យដឹងថា ហេតុការណ៍ផ្ទុះគ្រាប់បែកនេះ បាន​កើតឡើងនាវេលាម៉ោង ប្រមាណជា ១០៖៣៥នាទីយប់ថ្ងៃចន្ទ​សប្តាហ៍នេះ (ម៉ោងក្នុងតំបន់កើតហេតុ) នៅមាត់ច្រក​ចេញខាងក្រៅ​​​កន្លែងប្រគុំតន្រី្តដែលមានសមត្ថភាព​ ផ្ទុកអ្នកចូលរួមបានដល់ទៅ ២១,០០០នាក់នេះ ស្របពេលដែល​មនុស្សម្នាជាច្រើន ជា​ពិសេស​យុវវ័យ​បានចាកចេញមកវិញ។

គួរបញ្ជាក់ថា សម្រាប់ខណៈពេលនេះករណីខាងលើ ត្រូវបានអាជ្ញាធរអង់គ្លេសចាត់ទុកថា គឺជាអំពើវាយប្រហារដោយភេវកម្ម​​ រហូតដល់ពួកគេបើកការសង្កេតលម្អិតវែងឆ្ងាយបន្តទៅទៀត ហើយរកឃើញថា មិនមែនដូច្នេះទេនោះ។ ម៉្យាងវិញទៀតវត្ថុគួរ​ឲ្យសង្ស័យ ដែលអាចជាគ្រាប់បែកទីពីរនោះ តាមពិតទៅត្រូវបានក្រុមប៉ូលិសអះអាងបញ្ជាក់វិញថា គ្រាន់តែជាសំលៀកបំពាក់​បោះបង់ចោលតែប៉ុណ្ណោះ៕