(ឡុងដ៏)៖ ភេរវកម្មបំផ្ទុះគ្រាប់បែកនៅអង់គ្លេស ចំនួនអ្នកស្លាប់នៅក្នុងការវាយប្រហារបំផ្ទុះគ្រាប់បែក នៅកន្លែងប្រគុំតន្រ្តី Manchester Arena ស្ថិតភាគ​ពាយ័ព្យនៃប្រទេស អង់គ្លេសកាលពីថ្ងៃចន្ទ បានកើនដល់២២នាក់ហើយ ខណៈ មនុស្ស​៥៩នាក់ផ្សេងទៀតនោះ បានរងរបួស។ នេះបើតាមការចេញផ្សាយ ដោយសារព័ត៌មាន Russian Today នៅថ្ងៃអង្គារ ទី២៣ ខែឧសភា ឆ្នាំ២០១៧។

​យោងតាមអាជ្ញាធរអង់គ្លេស ការវាយប្រហារនេះត្រូវបានធ្វើឡើងដោយជនបំផ្ទុះគ្រាប់បែកអត្តឃាត រីឯនាយករដ្ឋមន្ត្រីអង់គ្លេស ក៏បានថ្កោល ទោសយ៉ាងខ្លំាងចំពោះការវាយប្រហារដ៏អាក្រក់នេះដែរ មិនប៉ុណ្ណោះលោកស្រីក៏បានលុបចោលការធ្វើយុទ្ធនាការឃោសនាបោះឆ្នោតជា បណ្ដោះអាសន្នទៀតផង។ មួយវិញទៀត ភ្លាមៗពុំទាន់មានក្រុមណាមួយចេញទទួលខុសត្រូវនៅឡើយទេ ក៏ប៉ុន្តែមួយរយៈពេលចុងក្រោយ ក្រុម ISIS តែងតែដឹកនាំសកម្មភាពវាយប្រហារភេរវកម្មនៅអឺរ៉ុប។​

ប៉ូលិសប្រចាំទីក្រុង Manchester ដែលជាទីក្រុងដ៏ធំបំផុតទីពីររបស់អង់គ្លេសបានឲ្យដឹងថា ហេតុការណ៍ផ្ទុះគ្រាប់បែកនេះ បាន​កើតឡើងនាវេលាម៉ោងប្រមាណជា១០៖៣៥នាទីយប់ថ្ងៃចន្ទសប្តាហ៍នេះ (ម៉ោងក្នុងតំបន់កើតហេតុ) នៅមាត់ច្រក​ចេញខាងក្រៅ​​​កន្លែងប្រគុំតន្រី្តដែលមានសមត្ថភាព​ផ្ទុក​អ្នកចូលរួមបានដល់ទៅ២១,០០០នាក់នេះ ស្របពេលដែលមនុស្សម្នាជាច្រើន ជា​ពិសេស​យុវវ័យបានចាកចេញមកវិញ។

គួរបញ្ជាក់ថា សម្រាប់ខណៈពេលនេះករណីខាងលើ ត្រូវបានអាជ្ញាធរអង់គ្លេសចាត់ទុកថា គឺជាអំពើវាយប្រហារដោយភេវកម្ម​​រហូតដល់ពួកគេបើកការសង្កេតលម្អិតវែងឆ្ងាយបន្តទៅទៀត ហើយរកឃើញថាមិនយ៉ាងដូច្នេះទេនោះ។ ម៉្យាងវិញទៀតវត្ថុគួរ​ឲ្យសង្ស័យដែលអាចជាគ្រាប់បែកទីពីរនោះ តាមពិតទៅត្រូវបានក្រុមប៉ូលិសអះអាងបញ្ជាក់វិញថា គ្រាន់តែជាសំលៀកបំពាក់​បោះបង់ចោលតែប៉ុណ្ណោះ៕