(ម៉ូស្គូ)៖ នៅព្រឹកថ្ងៃចន្ទនេះ ទីក្រុងព្យុងយ៉ាងបានប្រកាសពីជោគជ័យធំធេងនៃការធ្វើតេស្ត គ្រាប់មីស៊ីល​ផ្លោងរយៈចម្ងាយមធ្យម ដែលអាចបំពាក់ក្បាលគ្រាប់នុយក្លេអ៊ែរ ហើយនៅថ្ងៃដដែលនេះ លោក គីម ជុងអ៊ុន ក៏បានបញ្ជាមានការផលិតគ្រាប់មីស៊ីលប្រភេទនេះ ឲ្យបានច្រើនជាលក្ខណៈទ្រង់ទ្រាយធំ​ផងដែរ។ នេះ​បើតាមការចេញផ្សាយ​ដោយសារព័ត៌មានរុស្ស៊ី Sputnik នាព្រឹកថ្ងៃចន្ទ ទី២២ ខែឧសភា ឆ្នាំ២០១៧។

គ្រាប់មីស៊ីលដែលកូរ៉េខាងជើងធ្វើការបាញ់សាកល្បង កាលពីថ្ងៃទី២១ ខែឧសភា គឺជាប្រភេទរយៈចម្ងាយ​មធ្យម ដែលអាចហោះបាន ៥០០គីឡូម៉ែត្រ​មានឈ្មោះថា Pukguksong-2 ហើយទីក្រុងព្យុងយ៉ាង​អះអាងថា មីស៊ីលត្រូវបានបាញ់ និងធ្លាក់ចំគោលដៅ​​កំណត់យ៉ាងល្អឥតខ្ចោះតែម្តង ស្ថិតនៅក្នុង​សមុទ្រជប៉ុន ដែលស្ថិតនៅមិនឆ្ងាយ​ប៉ុន្មាន​​ពីតំបន់សេដ្ឋកិច្ចផ្តាច់មុខ​របស់ប្រទេសជប៉ុននោះឡើយ។

គួរបញ្ជាក់តាមក្រុមជំនាញ​កូរ៉េខាងត្បូងថា គ្រាប់មីស៊ីលដែល​កូរ៉េខាងជើងបានបាញ់ចេញ​ពីខេត្តភាគលិច​របស់ខ្លួននោះ គឺជាប្រភេទ​ដូចទៅនឹងគ្រាប់មីស៊ីល​ ដែលត្រូវបានបាញ់វកាលពីថ្ងៃទី១២ ខែកុម្ភៈនោះដែរ។ បន្ថែមពីការចេញ​បញ្ជាឲ្យផលិត Pukguksong-2 យ៉ាងច្រើននោះ លោក គីម ក៏បញ្ជាបន្ថែមទៀត ឲ្យកងទ័ព​​ធ្វើការដាក់ពង្រាយ​គ្រាប់មីស៊ីលប្រភេទនេះ នៅទីតាំងយុទ្ធសាស្ត្រសំខាន់ៗ​ទៀតផង៕