(តេហរ៉ង់)៖ យោងតាម​មន្រ្តី​រដ្ឋាភិបាលអ៊ីរ៉ង់ ដោយផ្អែលលើលទ្ធផល​​ឆ្នោតផ្លូវការ ប្រធានាធិបតីបច្ចុប្បន្ន លោក Hassan Rouhani បាននាំមុខគេនៅ​ក្នុងការបោះឆ្នោត ជ្រើសរើសប្រធានាធិបតីអ៊ីរ៉ង់អាណត្តិថ្មី ដោយផ្តួលគូប្រកួតដ៏ស្វិត​​ស្វាញម្នាក់គឺ លោក Ebrahim Raisi ដែលមានន័យថា លោកនឹងក្លាយជា​ប្រធានាធិបតីអ៊ីរ៉ង់ សម្រាប់អាណត្តិទីពីរជាបន្តទៀត។ នេះបើតាមការ​ចេញផ្សាយដោយ​ ទីភ្នាក់ងារព័ត៌មាន Aljazeera នៅមុននេះបន្តិចនារសៀល​ថ្ងៃសៅរ៍ ទី២០ ខែឧសភា ឆ្នាំ២០១៧។

ប្រភពដដែលបានឲ្យដឹងថា ក្នុងចំណោមសន្លឹកឆ្នោតទាំងអស់ជិត ៤០លានសន្លឹក លោក Rouhani បានទទួលការគាំទ្រសរុបចំនួន ៥៦.៨៨ភាគរយ និងគូប្រជែងខ្លាំងបំផុត គឺលោក Raisi ទទួលបាន​តែ ៣៨.៥៥ភាគរយប៉ុណ្ណោះ។ នេះបើតាមការដកស្រង់​សេចក្តីថ្លែងការណ៍ របស់ក្រសួងមហាផ្ទៃអ៊ីរ៉ង់ នៅថ្ងៃសៅរ៍ មួយថ្ងៃបន្ទាប់ពីការបោះឆ្នោត​ត្រូវបានបញ្ចប់។

គួរបញ្ជាក់ថា សម្រាប់ការ​បោះឆ្នោត​នា​ឆ្នាំ២០១៧នេះ រួមមានបេក្ខភាព​​ប្រធានាធិបតី​​ចំនួនបួនរូប គឺប្រធានាធិបតី​អ៊ីរ៉ង់ លោក Hassan Rouhani ដែលកំពុង​ឈរ​ឈ្មោះ​ ដើម្បីបន្តកាន់​​អំណាចក្នុង​អាណត្តិទីពីរ, លោក Seyyed Ebrahim Raeisi អតីតអនុប្រធាន​​តុលាការ, សមាជិកក្រុមប្រឹក្សា​​ប្រយោជន៍​ នៃប្រទេស​អ៊ីរ៉ង់ លោក Mostafa Aqa-Mirsalim, និងអតីតអនុប្រធានាធិបតី លោក Mostafa Hashemi-Taba។ ការបោះឆ្នោតលើនេះពិតជាសំខាន់ ខណៈដែលមេដឹកនាំអាណត្តិថ្មី នឹងត្រូវប្រឈមមុខចំពោះការ​ដោះស្រាយបញ្ហាទំនាក់ទំនងដ៏រកាំរកូស ជាមួយសហរដ្ឋអាមេរិក៕