(សេអ៊ូល)៖ កងទ័ពជើងទឹកអាមេរិកនៅថ្ងៃសុក្រនេះបានអះអាងថា នាវាផ្ទុកយន្ដហោះចម្បាំងពីរគ្រឿងរបស់ខ្លួន កំពុងធ្វើប្រតិបត្តិការល្បាត នៅតំបន់ប៉ាស៊ីហ្វិកខាងលិច (ក្បែរឧបទ្វីបកូរ៉េ) ខណៈស្ថានភាពនៅឧបទ្វីបកូរ៉េនៅតែបន្តតានតឹង ដោយសារសកម្មភាពបង្ករឿងបាញ់សាកល្បងមីស៊ីល ពីសំណាក់កូរ៉េខាងជើង។ នេះបើតាមការចេញផ្សាយដោយទីភ្នាក់ងារសារព័ត៌មានយ៉ុនហាប់ នៅថ្ងៃសុក្រ ទី១៩ ខែឧសភា ឆ្នាំ២០១៧។
យោងតាមកងទ័ពជើងទឹកអាមេរិក នាវាផ្ទុកយន្ដហោះចម្បាំង USS Ronald Reagan និង Air Wing Five កំពុងដឹកនាំប្រតិបត្តិការល្បាត នៅតំបន់ប៉ាស៊ីហ្វិកខាងលិច។ ព្រមពេលជាមួយគ្នា នាវាផ្ទុកយន្ដហោះចម្បាំង USS Carl Vinson ក៏បាននិងកំពុងធ្វើប្រតិបត្តិការនៅតំបន់ដែនទឹក ក្បែរឧបទ្វីបកូរ៉េផងដែរ ចាប់តាំងពីខែឧសភាមកម្លេះ ដើម្បីឃ្លំាមើលសកម្មភាពកូរ៉េខាងជើង ហើយគ្រោងនឹងបញ្ចប់បេសកកម្មនៅចុង ខែមិថុនា។ ទន្ទឹមគ្នានេះក្រុមមន្ត្រីកូរ៉េខាងត្បូងបានឱ្យដឹងថា នាវាផ្ទុកយន្ដហោះចម្បាំង USS Ronald Reagan និង Air Wing Five អាចនឹងចូលរួមធ្វើសមយុទ្ធយោធារួមគ្នា ជាមួយកងទ័ពជើងទឹកកូរ៉េខាងត្បូង នៅឯតំបន់សមុទ្រជប៉ុន ឬសមុទ្រខាងកើតនៅដើមខែមិថុនានេះ។
គួរបញ្ជាក់ថា បើតាមមន្ត្រីយោធាកូរ៉េខាងត្បូង កូរ៉េខាងជើងបានត្រៀមខ្លួនរួចហើយ ក្នុងការបំផ្ទុះសាកល្បងក្បាលគ្រាប់នុយក្លេអ៊ែរជាលើកទី០៦ ក៏ដូចជាបាញ់គ្រាប់រ៉ុក្កែតចំងាយឆ្ងាយ នាពេលអានាគតដ៏ខ្លីខាងមុខនេះ៕
