(សេអ៊ូល)៖ គ្រូពេទ្យវះកាត់កែសម្ផស្សកូរ៉េខាងត្បូងម្នាក់ ត្រូវបានតុលាការព្យួរទោសជាប់ពន្ធនាគាររយៈពេល ១៨ខែ សម្រាប់ការចេញកំណត់ត្រាព្យាបាលក្លែងក្លាយ ឱ្យអតីតប្រធានាធិបតីកូរ៉េខាងត្បូង លោកស្រី ផាក គឺនហេ ដែលកំពុងប្រឈមមុខនឹងដំណើរការក្ដី ជុំវិញរឿងអាស្រូវពុករលួយជាមួយស្ត្រីឈ្មោះ ឆយ ស៊ូនស៊ីល។ នេះបើតាមការចេញផ្សាយដោយសារព័ត៌មាន Channel News Asia នៅថ្ងៃព្រហស្បតិ៍ ទី១៨ ខែឧសភា ឆ្នាំ២០១៧។
យោងតាមក្រុមអ្នកស៊ើបអង្កេត គ្រូពេទ្យវះកាត់កែសម្ផស្ស លោក Kim Young-ja បានកុហុកសភាកូរ៉េខាងត្បូង នៅក្នុងអំឡុងពេលសវនាការ សាកសួរពាក់ព័ន្ធនឹងរឿងអាស្រូវ ឆយ ស៊ូនស៊ីល ដោយលោកបានចេញកំណត់ត្រាព្យាបាលក្លែងក្លាយ ឱ្យលោកស្រី ផាក នៅអំឡុងឆ្នាំ២០១៤ និង ២០១៦។ ចំណែកឯលោកស្រី ផាក ខ្លួនឯងក៏មិនបានប្រឹក្សាយោបល់ជាមួយក្រុមមន្ត្រីវេជ្ជបណ្ឌិតរបស់លោកស្រីដែរ មុននឹងទទួលការព្យាបាល ហើយម្យ៉ាវិញទៀតដោយសាតែរឿងកែសម្ផស្សនេះ លោកស្រីត្រូវបានគេចោទថា មិនបានស្ថិតនៅក្នុងការិយាល័យ អស់រយៈពេលជាច្រើនម៉ោងនៅចំថ្ងៃ កើតមានគ្រោះមហន្តរាយ លិចសាឡង់ដឹកសិស្សសាលា Sewol។
គួរបញ្ជាក់ថា បើតាមក្រុមមន្ត្រីតុលាការ ទោសរបស់លោក Kim Young-ja ត្រូវបានព្យួរសម្រាប់រយៈពេល៣ឆ្នាំ ដូច្នេះលោកនឹងមិនត្រូវជាប់ពន្ធនាគារនោះទេ ហើយលោកក៏បានទទួលស្គាល់កំហុសដែរ។ តែមេធាវីរបស់លោកថា នឹងពិភាក្សាលើរឿងប្ដឹងឧទ្ធរណ៍ ខណៈប្រពន្ធរបស់លោកត្រូវ តុលាការផ្តន្ទាទោសឱ្យជាប់ពន្ធនាគាររយៈពេល១ឆ្នាំ ពីបទពុករលួយ៕
