(តូក្យូ)៖ សមាជិកគ្រួសារ​ញាតិវង្ស ព្រះចៅអធិរាជ​ជប៉ុន ព្រះនាងម្ចាស់ Mako អាចនឹងបោះបង់​ខ្សែស្រឡាយ​រាជវង្ស ដើម្បីរៀបការជា​មួយបុរស​ជាជនសាមញ្ញម្នាក់ ដែលព្រះនាង​បានស្គាល់គ្នា អស់រយៈពេល​ជាង០៥ឆ្នាំមកនេះ។ នេះបើតាម​ប្រព័ន្ធផ្សព្វផ្សាយ​នៅក្នុងស្រុក ដកស្រង់ដោយ​សារព័ត៌មាន BBC នៅព្រឹកថ្ងៃព្រហស្បតិ៍ ទី១៨ ខែឧសភា ឆ្នាំ២០១៧។

យោងតាមប្រព័ន្ធ​ផ្សព្វផ្សាយ​ជប៉ុន ព្រះនាងម្ចាស់ Mako មានព្រះជន្ម​ ២៥វស្សា និងជាចៅស្រីច្បង របស់ព្រះចៅអធិរាជជប៉ុន Akihito នឹងភា្ជប់​ពាក្យជាមួយបុគ្គលិកក្រុមហ៊ុនច្បាប់​ម្នាក់ឈ្មោះ Kei Komuro អាយុ២៥ឆ្នាំ ដែលព្រះនាង​បានជួបកាលពីឆ្នាំ២០១២ ក្នុងវ័យសិក្សា​នៅឯសកលវិទ្យាល័យ International Christian University ក្នុងទីក្រុងតូក្យូ។

ពាក់ព័ន្ធបញ្ហាខាងលើនេះ ខាងរាជវាំងជប៉ុន​ពុំទាន់ធ្វើការអត្ថាធិប្បាយ​នៅឡើយទេ ខណៈនៅពេល សួរពាក់ព័ន្ធនឹង​គំរោងភ្ជាប់ពាក្យនេះ លោក Kei Komuro កាលពីថ្ងៃពុធ​បាននិយាយថា «នេះមិនមែន​ជាពេលវេលា សម្រាប់ឱ្យខ្ញុំធ្វើការ​អត្ថាធិប្បាយនោះទេ ប៉ុន្តែខ្ញុំនឹងនិយាយ​ពីរឿងនេះ នៅពេលសាកសម​ណាមួយ»។

គួរបញ្ជាក់ថា បើតាមច្បាប់រាជវង្សជប៉ុន ព្រះនាងម្ចាស់ Mako នឹងក្លាយជារាស្ត្រសាមញ្ញ បើសិនជាទ្រង់រៀបការជាមួយ លោក Kei Komuro៕   ​