(វ៉ាស៊ីនតោន)៖ ក្រសួងការបរទេសអាមេរិកបានទទួលស្គាល់ថា អង្គរក្សប្រធានាធិបតីតួកគី លោក Recep Tayyip Erdogan គឺជាអ្នកនៅពីក្រោយការប្រើប្រាស់អំពើហិង្សា លើក្រុមបាតុករឃើដ ដែលបានប្រមូលផ្តុំគ្នាតវ៉ាប្រឆាំងនឹងដំណើរទស្សនកិច្ចរបស់ លោក Erdogan មកកាន់ទីក្រុងវ៉ាស៊ីនតោន កាលពីថ្ងៃអង្គារ។ នេះបើតាមការចេញផ្សាយដោយសារព័ត៌មាន Russian Today នៅព្រឹកថ្ងៃព្រហស្បតិ៍ ទី១៨ ខែឧសភា ឆ្នាំ២០១៧។
យោងតាមអាជ្ញាធរអាមេរិក ការប៉ះទង្គិចគ្នាដោយហិង្សារវាងក្រុមអ្នកគាំទ្រ និងប្រឆាំងលោក Erdogan នៅខាងក្រៅស្ថានទូតតួកគីប្រចាំទីក្រុងវ៉ាស៊ីនតោន បានបង្កឱ្យមនុស្ស១២នាក់រងរបួស ក្នុងនោះមានម្នាក់ជាប៉ូលិស ខណៈមនុស្សចំនួន ០៩នាក់ បានចេញពីមន្ទីរពេទ្យហើយ រីឯ០២នាក់ផ្សេង ទៀតត្រូវបានចាប់ខ្លួនពាក់ព័ន្ធនឹងអំពើហិង្សានេះ។ ចំណែកឯក្រសួងការបរទេសអាមេរិក ក៏បានបង្ហាញក្ដីបារម្ភជាខ្លាំង ទៅកាន់រដ្ឋាភិបាលតួកគីផងដែរ។
គួរបញ្ជាក់ថា បើតាមសារព័ត៌មានតួកគី Anadolu កងអង្គរក្សរបស់លោក Erdogan បានចូលរួមបំបែកហ្វូងបាតុករដែលនៅកកកុញពីមុខស្ថានទូតអង់ការ៉ា ប្រចាំរដ្ឋធានីវ៉ាស៊ីនតោន ដោយសារតែអាជ្ញាធរអាមេរិក មិនបានស្ដាប់ការស្នើសុំអន្តរគមន៍ពីខាងតួកគី៕
