(វ៉ាស៊ីនតោន)៖ កាសែត New York Times បានរាយការណ៍ថា កាលពីខែកុម្ភៈ ប្រធានាធិបតីអាមេរិកលោក ដូណាល់ ត្រាំ បានស្នើសុំឱ្យនាយក FBI លោក James Comey បិទបញ្ចប់ការស៊ើបអង្កេតលើអតីតទីប្រឹក្សាសន្តិសុខជាតិអាមេរិក លោក Michael Flynn ពាក់ព័ន្ធនឹងការសង្ស័យថា លោកមានទំនាក់ទំនងជាមួយទីក្រុងមូស្គូ។ ព័ត៌មាននេះកំពុងធ្វើឱ្យគេជឿជាក់ថា វាអាចជាមូលហេតុមួយដែលលោក ត្រាំ សម្រេចចិត្តដេញ លោក Comey ពីដំណែងនាយក FBI។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃ ពុធ ទី១៧ ខែឧសភា ឆ្នាំ២០១៧។
យោងតាម New York Times គ្រាន់តែបានលឺការស្នើសុំនេះភ្លាម លោក Comey បានសរសេរកំណត់ហេតុមួយទុក ដោយលោកបញ្ជាក់ថា លោកត្រាំ បានប្រាប់លោកដូច្នេះថា៖ «ខ្ញុំសង្ឃឹមថាអ្នក (Comey) នឹងបណ្ដោយឱ្យរឿងនេះកន្លងហួសទៅចុះ ហើយខ្ញុំក៏សង្ឃឹមដែរថា អ្នកអាចធ្វើការសន្និដ្ឋានមួយដ៏ល្អក្នុង ការទុកឱ្យរឿងលោក Flynn កន្លងហួស និងថាគាត់ជាមនុស្សល្អ»។ តែទោះយ៉ាងណា ខាងសេតវិមានបានបដិសេធ ការលើកឡើងនេះ ដោយចាត់ទុកថាវាគឺជារឿងមិនពិត រីឯលោក ដូណាល់ ត្រាំ ក៏មិនដែលបានស្នើសុំបែបនេះដែរ។
គួររំលឹកថា លោក Michael Flynn បានលាលែងពីតំណែងជាទីប្រឹក្សាសន្តិសុខជាតិអាមេរិក កាលពីថ្ងៃទី១៣ ខែកុម្ភៈ ក្រោយលេចលឺព័ត៌មាន ជាច្រើនថាលោក មានទំនាក់ទំនងជាមួយអគ្គរដ្ឋទូតរុស្ស៊ីប្រចាំទីក្រុងវ៉ាស៊ីនតោន លោក Sergueï Kisliak។ ដោយឡែក លោក Comey វិញត្រូវ បានលោក ត្រាំ បណ្ដេញចេញពីតំណែងកាលពីសប្ដាហ៍មុន ក្រោមហេតុផលសមត្ថភាព។ ក៏ប៉ុន្តែបើគេចាំមិនភ្លេចទេ លោកត្រាំផ្ទាល់គឺជាអ្នកស្នើ ឱ្យលោក Comey បន្តកាន់តំណែងជានាយក FBI ហើយលោកក៏ធ្លាប់បានសរសើរមិនដាច់ពីមាត់ពីសមត្ថភាពរបស់លោក Comey ផងដែរ៕
