(ការ៉ាកាស់)៖ អគ្គរដ្ឋអាជ្ញានៃប្រទេសវេណេស៊ុយអេឡា បានឲ្យដឹងនៅថ្ងៃពុធថា យុវវ័យម្នាក់វ័យ ១៥ឆ្នាំ បានស្លាប់នៅក្នុងបាតុកម្មដ៏បង្ហូរឈាម ដែលបានអូសបន្លាយរាប់ខែមកហើយ នៅក្នុងប្រទេសអាមេរិកឡាទីនមួយនេះ នាំឲ្យមនុស្សស្លាប់សរុបកើនឡើងដល់ចំនួន ៤៣នាក់។ នេះបើតាមការចេញផ្សាយដោយទីភ្នាក់ងារព័ត៌មានចិនស៊ិនហួរ នាព្រឹកថ្ងៃព្រហស្បតិ៍ ទី១៨ ខែឧសភា ឆ្នាំ២០១៧។
ជុំវិញករណីស្លាប់យុវវ័យឈ្មោះ Jose Francisco Guerrero ខាងលើនេះ ត្រូវបានរដ្ឋាភិបាលវេណេស៊ុយអេឡា ចេញបញ្ជាទៅប៉ូលិសឲ្យបើកការស៊ើបអង្កេតរកមុនជនដៃដល់ ខណៈដែលបុរសវ័យក្មេងរូបនេះត្រូវបានគេបាញ់ចំកណ្តាលខ្នងបណ្តាលឲ្យស្លាប់ អំឡុងពេលធ្វើបាតុកម្មនៅក្នុងរដ្ឋ Tachira ភាគខាងលិចប្រទេស។
ជុំវិញបាតុកម្មដ៏ចម្រូងចម្រាសនេះ ក្រសួងការពារជាតិវេណេស៊ុយអេឡា បានសម្រេចដាក់ពង្រាយកងកម្លាំងពិសេសសរុប ៦០០នាក់ និងទាហានទូទៅ ២,០០០នាក់ ដើម្បីការពារសន្តិសុខ និងបង្ក្រាបក្រុមជនដែលបង្កអំពើហិង្សា ដែលផ្ទុយនឹងច្បាប់របស់ប្រទេសអាមេរិកឡាទីនមួយនេះ ខណៈកងកម្លាំងមួយចំនួនត្រូវបានគេរាយការណ៍ថា បានទទួលរងរបួស ដោយសារតែអំពើហិង្សាពីសំណាក់ហ្វូងបាតុករផងដែរ។
គួរបញ្ជាក់ថា ប្រជាជនវេណេស៊ុយអេឡារាប់ពាន់នាក់ បាននាំគ្នាចុះតាមដងផ្លូវធ្វើបាតុកម្មតវ៉ាជាថ្មី កាលពីប៉ុន្មានសប្ដាហ៍កន្លងទៅនេះ ដើម្បីតវ៉ាជំទាស់នឹងរដ្ឋាភិបាលរបស់លោកប្រធានាធិបតី នីកូឡាស់ ម៉ាឌូរ៉ូ ដែលពួកគេចោទថា បានបណ្ដោយឱ្យប្រទេសធ្លាក់ចូលក្នុងវិបត្តិសេដ្ឋកិច្ច ម្ហូបអាហារឡើងថ្លៃគ្រប់មុខ ហើយជាងនេះទៅទៀត ពួកគេក៏បានអំពាវនាវផងដែរ ឱ្យមានការដោះលែងសកម្មជនសិទ្ធិមនុស្ស និងអ្នកនយោបាយ។ ក៏ប៉ុន្តែលោក ម៉ាឌូរ៉ូ បានទម្លាក់ការទទួលខុសត្រូវលើក្រុមគណបក្សប្រឆាំង ដែលជាអ្នកបង្កឲ្យមានវិបត្តិដូចពេលបច្ចុប្បន្ន ក៏ដូចជាការស្លាប់របស់ក្រុមបាតុករ ដែលលោកចាត់ទុកថា មានចេតនាទម្លាក់លោកពីតំណែង ដោយមានការគាំទ្រពីគណបក្សប្រឆាំង មានសហរដ្ឋអាមេរិកជាខ្នងបង្អែក៕
