(ប៉េកាំង)៖ យោងតាមសារព័ត៌មានមួយរបស់រដ្ឋាភិបាលចិន ដែលបានផ្តល់ព័ត៌មានលម្អិតថ្មីបន្ថែម អំពីការបង្កើនឥទ្ធិពលយោធារបស់ចិន ទីក្រុងប៉េកាំងបានដាក់តំឡើងប្រព័ន្ធបាញ់គ្រាប់រ៉ុក្កែតមួយចំនួន នៅលើតំបន់ថ្មប៉ប្រះទឹកមួយកន្លែង ក្នុងដែនសមុទ្រចិនខាងត្បូងដែលមានបញ្ហាវិវាទ។ នេះបើតាមការចេញផ្សាយដោយសារព័ត៌មាន Channel News Asia នៅល្ងាចថ្ងៃពុធ ទី១៧ ខែឧសភា ឆ្នាំ២០១៧។
សារព័ត៌មានរដ្ឋ Defence Times នាពេលថ្មីៗនេះបានឲ្យដឹងនៅក្នុងសេចក្តីរាយការណ៍មួយ លើបណ្តាញសង្គម WeChat ថា ប្រព័ន្ធបាញ់គ្រាប់រ៉ុក្កែតប្រភេទ Norinco AS/AR-1 ជាមួយនិងសមត្ថភាពតាមស្វែងរក កំណត់គោលដៅ និងវាយប្រហារទៅលើក្រុមសត្រូវ ដែលមុជចូលក្រោមផ្ទៃទឹកនោះ ត្រូវបានតំឡើងនៅលើតំបន់ថ្មប៉ប្រះទឹក Fiery Cross ស្ថិតក្នុងប្រជុំកោះ Spartly Island នៃដែនសមុទ្រចិនខាងត្បូង។
គួរបញ្ជាក់ថា តំបន់ថ្មប៉ប្រះទឹក Fiery Cross បច្ចុប្បន្នស្ថិតក្រោមការគ្រប់គ្រងរបស់ចិន ប៉ុន្តែក៏ត្រូវបានការទាមទារដោយហ្វីលីពីន វៀតណាម និងតៃវ៉ាន់ផងដែរ។ យ៉ាងណាមិញសេចក្តីរាយការណ៍ខាងលើ ពុំបានបញ្ជាក់ថា ប្រព័ន្ធការពារនេះ ត្រូវបានតំឡើងកាលពីពេលណានោះឡើយ ដោយគ្រាន់តែបង្ហើបថា វាស្ថិតក្នុងផ្នែកនៃវិធានការឆ្លើយតបមួយ ដែលបានចាប់ផ្តើមកាលពីខែឧសភា ឆ្នាំ២០១៤ នៅពេលដែលក្រុមទាហានមុជទឹកវៀតណាម បានបង្កប់សំណាញ់ចាប់ត្រីធំៗជាច្រើន នៅប្រជុំកោះ Paracel៕
