(ឡុងដ៏)៖ ក្រុម Hacker មានសម្ព័ន្ធភាពជាមួយកូរ៉េខាងជើង ទំនងជាបានដឹកនាំការវាយប្រហារព័ត៌មានវិទ្យា មិនធ្លាប់មានពីមុនមកតាមរយៈការប្រើ ប្រាស់កម្មវិធីមេរោគ WannaCry ដែលបានវាយប្រហារលើកុំព្យូទ័រជាង ៣០០ ០០០គ្រឿង នៅក្នុងប្រទេសចំនួន១៥០។ នេះបើតាមក្រុមអ្នកជំនាញ ផ្នែកព័ត៌មានវិទ្យា ដកស្រង់ដោយសារព័ត៌មាន Daily Mail​ នៅថ្ងៃអង្គារ ទី១៦ ខែឧសភា ឆ្នាំ២០១៧។

ជុំវិញបញ្ហានេះដែរ ក្រុមហ៊ុនផ្នែកសន្តិសុខព័ត៌មានវិទ្យា Symantec និង Kaspersky កំពុងធ្វើការវិភាគលើធាតុផ្សំដែល អាចមានជាប់ ពាក់ព័ន្ធនឹង ការវាយប្រហារព័ត៌មានវិទ្យា តាមរយៈការប្រើប្រាស់កម្មវិធីមេរោគ WannaCry ទៅនឹងកម្មវិធីមេរោគអភិវឌ្ឍដោយកូរ៉េខាងជើង។ ក៏ប៉ន្តែទន្ទឹមគ្នា ក្រុមអ្នកជំនាញព័ត៌មានវិទ្យាមួយចំនួនយល់ថាក្រុម Hacker ​ឈ្មោះ ​Lazarus  ដែលមានសម្ព័ន្ធភាពជាមួយកូរ៉េខាងជើងគឺជាអ្នកនៅពីក្រោយការ បង្កើតកម្មវិធីមេរោគ WannaCry នេះតែម្ដង។  

គួររំលឹកថា កាលពីឆ្នាំ២០០៩ ក្រុម Hacker Lazarus ធ្លាប់ត្រូវបានគេសង្ស័យម្ដងរួចមកហើយថា បានដឹកនាំការវាយប្រហារ ព័ត៌មានវិទ្យា លួចលុយជាង ៨១លានដុល្លារពីធនាគារកណ្ដាលបង់ក្លាដែស។ ដោយឡែកបច្ចុប្បន្នកម្មវិធីមេរោគ WannaCry ក៏កំពុងបង្កជាការព្រួយបារម្ភជាខ្លាំងដល់សន្តិសុខព័ត៌មាន វិទ្យាផងដែរ ត្បិតគិតចាប់តាំងពីថ្ងៃទី១២ ខែឧសភាមក WannaCry បានវាយប្រហារលើកុំព្យូទ័រ​ជាង ៣០០,០០០គ្រឿង នៅក្នុងប្រទេសចំនួន១៥០ នៅទូទំាងពិភពលោក។ WannaCry គឺជាប្រភេទកម្មវិធីមេរោគ ដែលក្រុម Hacker ប្រើដើម្បីជំរិតទារប្រាក់ដោយវាធ្វើ​ឱ្យកម្មវិធី ឬឯកសារនៅក្នុងកុំព្យូទ័រប្រើបា្រស់ កម្មវិធី Window របស់ក្រុមហ៊ុន Microsoft ជាប់គាំងបើកមិនកើត ហើយដើម្បីបើកឯកសារ នោះគេត្រូវបង់ប្រាក់យ៉ាងតិច ៣០០ដុល្លារ៕