(​បាងកក)៖ អាជ្ញាធរថៃ​នៅថ្ងៃអង្គារនេះ បានសម្រេចចិត្ត​ទម្លាក់ចោលការព្រមានបិទដំណើរ​ការបណ្ដាញ​ទំនាក់ទំនង​សង្គម Facebook ពាក់ព័ន្ធ​នឹងការ បង្ហោះសារ​ដែលត្រូវបានចាត់​ទុកថា​ ជាការប្រមាថអង្គព្រះមហាក្សត្រ និងគ្រួសាររាជវង្ស។ ការសម្រេចចិត្តនេះ​ធ្វើឡើងបន្ទាប់ពី​ក្រុមហ៊ុនយក្សមួយនេះ​ យល់ព្រមលុបសារ​ទំាងនេះ​ចោល។ នេះបើតាម​ការចេញផ្សាយដោយ​សារព័ត៌មាន Channel News Asia នៅរសៀលថ្ងៃអង្គារ ទី១៦ ខែឧសភា ឆ្នាំ២០១៧។

នៅក្នុងប្រទេសថៃ​ការប្រមាថព្រះមហាក្សត្រ ឬគ្រួសារញាតិវង្ស នឹងត្រូវទទួលទោស​យ៉ាងធ្ងន់ធ្ងរ ជាក់ស្ដែងកាល​ពីជាង​០៣ឆ្នាំមុន មនុស្សច្រើន​ជាង ១០០នាក់ បានទទួលការផ្តន្ទាទោស​ពីបទប្រមាថព្រះមហាក្សត្រ​ ដោយមានអ្នកខ្លះ​ត្រូវជាប់ពន្ធនាគា​រច្រើនជាង ១០ឆ្នាំ ឯណោះ។ លើសពីនេះ​ទៅទៀត ចាប់តាំងពីទ្រង់ មហា វិចិ្ឆរ៉ាឡុងកន សោយរាជ្យជា​ព្រះមហាក្សត្រថៃ មនុស្ស​០៧នាក់​ត្រូវបានចោទប្រកាន់​ពីបទប្រមាថ ព្រះមហាក្សត្រ​ ក្នុងនោះមានមេធាវីការពារ​សិទ្ធិមនុស្ស គឺលោក Prawet Prapanukul អាចនឹងប្រឈមមុខ​ជាប់ពន្ធនាគារ​រហូតដល់ទៅ​ ១៥០ឆ្នាំ ក្រោយលោក​ជាប់ចោទថា បានប្រមាថ​ព្រះមហាក្សត្រ​ ដោយប្រើ​គណនីបណ្ដាញ​ទំនាក់ទំនងសង្គម​ចំនួន១០ ដាច់ដោយឡែកពីគ្នា។

ពាក់ព័ន្ធនឹងការគំរាមបិទ Facebook អគ្គលេខាធិការ​អាជ្ញាធរ​និយ័តកម្មទូរគមនាគមន៍ថៃ NBTC លោក Takorn Tantasith បានប្រាប់អ្នក​សារព័ត៌មាន ក្រោយការដាក់ឱសានវាទ​បញ្ចប់នៅម៉ោង១០៖០០នាទីព្រឹកថ្ងៃអង្គារនេះថា អាជ្ញាធរថៃបាន​ទម្លាក់ចោលការព្រមាន​បិទ Facebook បន្ទាប់ពីក្រុមហ៊ុន​មួយនេះ យល់​ព្រមសហការជា​មួយអាជ្ញាធរថៃ ដោយបាន​សន្យានឹងលុបចោល​សារជាង ១៣០ ដែលត្រូវបានចាត់ទុកថា ជាការប្រមាថព្រះមហាក្សត្រ៕