(តូក្យូ)៖ សាកសពមនុស្ស​០៤នាក់ ត្រូវបានគេរកឃើញ​ហើយ បន្ទាប់ពីយន្ដហោះស៊ើបការណ៍មួយគ្រឿងធុន LR-2 របស់កងកម្លាំង​ស្វ័យការពារ​ជប៉ុនបាន ធ្លាក់នៅឯកោះ Hokkaido កាលពីថ្ងៃចន្ទ។ នេះបើតាម​ប្រព័ន្ធផ្សព្វផ្សាយ​នៅក្នុងស្រុក ដកស្រង់ដោយសារព័ត៌មាន​ចិនស៊ិនហួរ នៅរសៀលថ្ងៃអង្គារ ទី១៦ ខែឧសភា ឆ្នាំ២០១៧។

យោងតាម​សារព័ត៌មាន​ជប៉ុន NHK យន្ដហោះ LR-2 ផ្ទុកមនុស្ស​០៤នាក់ ក្នុងនោះមាន​អ្នកបើកបរ០២នាក់ និងអ្នកបចេ្ចកទេស​០២នាក់ បានបាត់ចេញពី​ប្រព័ន្ធរ៉ាដានៅម៉ោងប្រមាណ ១១៖៤៧នាទីព្រឹក (ម៉ោងនៅ​ក្នុងតំបន់) នៅឯតំបន់ភ្នំ​មួយកន្លែងស្ថិតនៅចំងាយ ៣០គីឡូម៉ែត្រ ពីអាកាសយានដ្ឋាន Hakodate Airport។ NHK បានបន្ថែម​ទៀតថា យន្ដហោះ LR-2 បានធ្វើដំណើរ​ទៅផ្ដល់ជំនួយមនុស្សធម៌​ជាថ្នាំពេទ្យ​សង្រ្គោះបន្ទាន់ និងដឹកអ្នកជំងឺ​តបតាម សំណើររបស់​អភិបាលកោះ Hokkaido។

គួរបញ្ជាក់ថា បំណែកយន្ដហោះ និងសកសព​មនុស្សទាំង ០៤នាក់ខាងលើត្រូវបានគេរកឃើញ​នៅក្បែរតំបន់ព្រៃ​នៃទីក្រុង Assabu នៃភាគខាងត្បូង​កោះ Hokkaido ខណៈមនុស្ស​ជាង ១៨០០នាក់ បានចូលរួមនៅ​ក្នុងប្រតិបត្តិការ​តាមស្វែងរកនេះ។ ចំណែកឯ​មូលហេតុ​នៃការធ្លាក់ កំពុងស្ថិតនៅ​ក្រោមការស៊ើបអង្កេត តែជាជំហ៊ាន​គេជឿជាក់ថា​ បញ្ហាអាកាសធាតុ​អាចជាមូលហេតុ​នៃគ្រោះថ្នាក់ធ្លាក់​យន្ដហោះ LR-2៕