(បាងកក)៖ ការដាក់សម្ពាធ​ពីសំណាក់រដ្ឋាភិបាលថៃ អាចបង្ខំឲ្យសមាគម​ផ្គត់ផ្គង់សេវាអ៊ីនធើណែត Tispa របស់ប្រទេសអាស៊ាន​​មួយនេះ ធ្វើការបិទដំណើរ​នៃបណ្តាញទំនាក់ទំនង​សង្គម Facebook។ នេះបើតាម​សេចក្តីរាយការណ៍​របស់កាសែតថៃ បាងកក​ប៉ុស្តិ៍ ដកស្រង់​ដោយសារព័ត៌មាន Channel News Asia នៅព្រឹក​ថ្ងៃអង្គារ ទី១៦ ខែឧសភា ឆ្នាំ២០១៧។

យោងតាម​សេចក្តីរាយការណ៍​របស់បាងកកប៉ុស្តិ៍ Tispa បានឲ្យដឹងថា ខ្លួនអាចនឹង​ផ្តាច់ប្រព័ន្ធ​ផ្តល់ទិន្នន័យ CDN របស់ Facebook ដោយសារតែ​ការបដិសេធ​របស់បណ្តាញ​ទំនាក់ទំនងសង្គម ដ៏ធំជាងគេមួយនេះ ចំពោះការលុប​ចោល Link URL ឬ Post មិន​សម​រម្យ​ទាំងឡាយចេញពី​វែបសាយរបស់ខ្លួន។ ជាមួយគ្នានេះ ពួកគេក៏បាន​ផ្ញើសំណើរបស់ខ្លួន ទៅកាន់នាយកគ្រប់គ្រង​​របស់​ Facebook ប្រចាំនៅ​ប្រទេសថៃ តាមរយៈសារ​អ៊ីម៉ែល ជាមួយនឹង​ពេលកំណត់នាម៉ោង ១០៖០០នាទីព្រឹកថ្ងៃ​អង្គារនេះ (ម៉ោង​ក្នុង​ទីក្រុងបាងកក) ដើម្បីអនុវត្តន៍​តាមការទាមទារនេះ។

អាជ្ញាធរថៃធ្លាប់​បានព្រមានក្រុមហ៊ុន Facebook ឲ្យលុបចោល​ខ្លឹមសារមួយចំនួន ដែលត្រូវបាន​ចាត់ទុកថា ជាការគំរាមកំហែង​​ដល់សន្តិសុខជាតិ និងការបំពាន​ច្បាប់ការពារខ្សែ​រាជវង្សដ៏តឹងរ៉ឹង​របស់ប្រទេសថៃ។ គណៈកម្មការ​ទូរគមនាគមន៍ និងផ្សព្វផ្សាយ​ជាតិថៃ​បានឲ្យដឹងថា Facebook មិនបានលុប​ចោលអាស័យដ្ឋាន​វែបសាយ​ចំនួន ១៣១ ក្នុងចំណោមអាស័យដ្ឋាន​ទាំង ៣០៩ តាមការស្នើសុំពីរដ្ឋាភិបាល នៅ​លើ​បណ្តាញ​ទំនាក់ទំនងសង្គម​របស់ខ្លួននោះឡើយ។

ហេតុដូច្នេះបើ​អាជ្ញាធរពាក់ព័ន្ធ​នៅតែរកឃើញ​មានខ្លឹមសារខុសច្បាប់​ នៅលើគេហទំព័រ Facebook ទៀត ជាពិសេស​អាស័យ​ដ្ឋាន URL ទាំង១៣១ ដែលមិនទាន់ត្រូវ​បានលុបចោលនោះ អាជ្ញាធរថៃ​នឹងទាមទារឲ្យ​បិទដំណើរ​ការរបស់ Facebook នៅ​ទូទាំង​ប្រទេស ដើម្បី Block ខ្លឹមសារ​មិនស្របច្បាប់​ទាំងនោះ។  

គួរបញ្ជាក់ថា ក្រុមហ៊ុនបណ្តាញទំនាក់ទំនងសង្គម Facebook បានបើកសាខារបស់ខ្លួន នៅក្នុងប្រទេសថៃ កាលពីខែកញ្ញា ឆ្នាំ២០១៥ និងជារឿយៗបានក្លាយខ្លួនជា​ប្រធានបទនៃករណីជាច្រើន ពាក់ព័ន្ធនឹងបទ​ប្រមាថព្រះមហាក្សត្រ ដែលជនជាតិ​ថៃ​​​បានទទួលរងការចោទប្រកាន់ចំពោះ​ការចែកចាយ Facebook Post មួយចំនួនដែលមានទំនោរប្រមាថខ្សែរាជវង្ស៕