(ប៊ែរឡាំង)៖ ប្រធានាធិបតីបារាំង លោក Emmanuel Macron និងអធិបការបតីអាល្លឺម៉ង់ លោកស្រី Angela Merkel អះអាងថា បានត្រៀមខ្លួនរួចជាស្រេចក្នុងការធ្វើកំណែទម្រង់ស៊ីជំរៅ លើសន្ធិសញ្ញាអឺរ៉ុប បើសិនជាចាំបាច់។ ប៉ុន្តែការធ្វើកំណែទម្រង់នេះមិនមែនអាស្រ័យតែលើបារំាង និងអាល្លឺម៉ង់ដែល ជាក្បាលម៉ាស៊ីនសហភាពអឺរ៉ុបនោះទេ។ នេះបើតាមការចេញផ្សាយដោយសារព័ត៌មាន Russian Today នៅព្រឹកថ្ងៃអង្គារ ទី១៦ ខែឧសភា ឆ្នាំ២០១៧។
ការលើកឡើងបែបនេះ ធ្វើឡើងនៅក្នុងឱកាសដែល លោក Macron បំពេញទស្សនកិច្ចនៅឯបរទេសជាលើកដំបូងបំផុតទៅកាន់អាល្លឺម៉ង់ ចាប់តាំងពីលោកស្បថចូលកាន់តំណែងជាប្រធានាធិបតីបារាំងកាលពីថ្ងៃអាទិត្យ។ ជាមួយគ្នានោះដែរ ថ្លែងនៅក្នុងសន្និសីទព័ត៌មានរួមគ្នាជាមួយលោកស្រី Merkel នៅឯទីក្រុងប៊ែរឡាំង លោក Macron បាននិយាយថា លោកពិតជារីករាយនឹងធ្វើការងាររួមគ្នាជាមួយអាល្លឺម៉ង់ ដើម្បីសហភាពអឺរ៉ុប និងតំបន់ចាយប្រាក់អឺរ៉ូ ហើយថាការធ្វើកំណែទម្រង់សន្ធិសញ្ញាអឺរ៉ុប មិនមែនជាការហាមឃាត់ទៀតនោះទេសម្រាប់បារាំង នៅក្នុងករណីចាំបាច់។
ដោយឡែកឆ្លើយតបនឹងសំណួរពាក់ព័ន្ធនឹងការកែប្រែសន្ធិសញ្ញាអឺរ៉ុបនេះដែរ លោកស្រី Merkel បានថ្លែងយ៉ាងដូច្នេះថា «យើងបានលើកឡើងពីប្រធានបទនេះ ... ហើយការកែប្រែសន្ធិសញ្ញាអឺរ៉ុប អាចធ្វើទៅបានបើសិនជាវាមានភាពចាំបាច់ ពោលគឺយើងត្រូវដឹងជាមុនសិនថា ហេតុអ្វីបានជាយើងចាំបាច់ត្រូវធ្វើកំណែទម្រង់»។
គួរបញ្ជាក់ថា សហភាពអឺរ៉ុបដំណើរការទៅបានអាស្រ័យលើកិច្ចព្រមព្រៀមសំខាន់ៗពីរ នោះគឺសន្ធិសញ្ញាស្ដីពីការប្រព្រឹត្តទៅនៃសហភាពអឺរ៉ុប (ឆ្នាំ១៩៥៧) និងសន្ធិសញ្ញាស្ដីពីសហភាពអឺរ៉ុប (ឆ្នាំ១៩៩២)។ មួយវិញទៀតការកែប្រែសន្ធិសញ្ញាទំាងនេះ មិនមែនអាស្រ័យតែលើបារំាង និងអាល្លឺម៉ង់ ដែលជាក្បាលម៉ាស៊ីនសហភាពអឺរ៉ុបនោះទេ តែវាគឺអាស្រ័យលើសមាជិកនៃប្លុកទំាងមូលតែម្ដង៕
