(សេអ៊ូល)៖ អត្រានៃការធ្វើពាណិជ្ជកម្មប្រចាំឆ្នាំរវាងប្រទេសកូរ៉េខាងជើង និងរុស្ស៊ី បានកើនឡើងខ្ពស់ដល់ទៅជាង ៨៥ភាគរយ នៅក្នុងអំឡុងត្រីមាសនៃដើមឆ្នាំ២០១៧នេះ ដែលជាចម្បងគឺដោយសារតែកំណើន នៃការនាំចេញផលិតផលរបស់ប្រទេសរុស្ស៊ី ដោយផ្ទុយពីបំរាមលើវិស័យពាណិជ្ជកម្មរបស់អង្គការសហប្រជាជាតិ ដែលត្រូវបានដាក់ជាការប្រឆាំងកម្មវិធីនុយក្លេអ៊ែរ និងមីស៊ីលផ្លោងរបស់របបដឹកនាំទីក្រុងព្យុងយ៉ាង។ នេះបើតាមការចេញផ្សាយដោយ ទីភ្នាក់ងារព័ត៌មានកូរ៉េខាងត្បូង យុនហ៉ាប់ នៅព្រឹកថ្ងៃអង្គារ ទី១៦ ខែឧសភា ឆ្នាំ២០១៧។
ប្រព័ន្ធផ្សព្វផ្សាយអាមេរិក VOA ដែលទទួលបានប្រភពទិន្នន័យពីអាជ្ញាធរគយសហព័ន្ធរបស់ប្រទេសរុស្ស៊ី បានធ្វើសេចក្តីរាយការណ៍ថា តម្លៃពាណិជ្ជកម្មកូរ៉េខាងជើង-រុស្ស៊ី មានចំនួន ៣១.៨៣លានដុល្លារសហរដ្ឋអាមេរិក គិតចាប់ពីខែមករាដល់ខែមីនា ដែលវាបានកើនឡើង ៨៥ភាគរយ ពីរយៈពេលដូចគ្នានៅឆ្នាំ២០១៦។ ទីក្រុងម៉ូស្គូបានធ្វើការនាំចេញផលិតផល គិតជាតម្លៃសរុប ៣១លានដុល្លារ ទៅកាន់ទីក្រុងព្យុងយ៉ាង ដោយនៅក្នុងនោះមានធ្យូងថ្មស្ថិតនៅលើលំដាប់ខ្ពស់ជាងគេគឺ ២២លានដុល្លារ (៧១ភាគរយនៃផលិតផលសរុប)។
ផ្ទុយទៅវិញយោងតាមប្រភពដដែល ការនាំចូលរបស់រុស្ស៊ីពីប្រទេសកូរ៉េខាងជើងបានធ្លាក់ចុះ ៨៨ភាគរយ ពោលគឺនៅត្រឹម ៤២០,០០០ដុល្លារ ក្នុងអំឡុងរយៈពេលបីខែដើមឆ្នាំនេះ។ សម្រាប់ផលិតផលនាំចូលសំខាន់ៗរួមមានសារធាតុគីមី (១៥០,០០០ដុល្លារ) និងឧបករណ៍តន្រ្តី (១១០,០០០ដុល្លារ)៕
