(ប៉េកាំង)៖ ប្រទេស អារ៉ាប៊ី សាអូឌីត និងរុស្ស៊ី បានព្រមព្រៀងគ្នាអូសបន្លាយរយៈពេល នៃការកាត់បន្ថយការផលិតប្រេងឆៅរបស់ខ្លួន រហូតដល់ខែមីនា ឆ្នាំ២០១៨ ហើយដែលការសម្រេចចិត្តនេះ ធ្វើឡើងនៅក្នុងក្របខណ្ឌនៃកិច្ចខិតខំប្រឹងប្រែង ធ្វើឱ្យមានតុល្យភាពឡើងវិញតម្លៃប្រេងឆៅនៅលើ ទីផ្សារពិភពលោក។ នេះបើតាមសម្តីរដ្ឋមន្ត្រីប្រេងប្រទេសទំាងពីរ ដកស្រង់ដោយសារព័ត៌មាន Channel News Asia នៅព្រឹកថ្ងៃចន្ទ ទី១៥ ខែឧសភា ឆ្នាំ២០១៧។
ថ្លែងនៅក្នុងសន្និសីទសារព័ត៌មានរួមដ៏ខ្លីនៅឯទីក្រុងប៉េកាំង រដ្ឋមន្ត្រីប្រេងប្រទេស អារ៉ាប៊ី សាអ៊ូឌីត លោក Khalid al-Falih បានឱ្យដឹងថា ការកាត់បន្ថយការផលិតប្រេងឆៅ នឹងត្រូវធ្វើឡើងតាមរយៈពេលកំណត់ដូចគ្នា ដូចមានចែងនៅក្នុងកិច្ចព្រមព្រៀង។ រីឯរដ្ឋមន្រ្តីប្រេងរុស្ស៊ី លោក Alexandra Novak ក៏បាននិយាយផងដែរថា ការកាត់បន្ថយនេះនឹងចូលរួមចំណែកធ្វើឱ្យតម្លៃប្រេងឆៅនៅលើទីផ្សារពិភពលោក មានតុល្យភាពឡើងវិញ។
គួររំលឹកថា អនុឡោមតាមកិច្ចព្រមព្រៀងបច្ចុប្បន្ន បណ្ដាប្រទេសនៃអង្គការនាំចេញប្រេងពិភពលោក ឬហៅការថា OPEC រួមទាំងរុស្ស៊ីបានសន្យាថា នឹងកាត់បន្ថយការផលិតប្រេងឆៅរបស់ពួកគេ យ៉ាងហោចណាស់ឱ្យបាន ១.៨លានបារ៉ែល ក្នុងមួយថ្ងៃនៃរយៈពេលពាក់កណ្ដាលឆ្នាំដំបូង៕
