(សេអ៊ូល)៖ រំលឹកកាលពីខែមីនាកន្លងទៅ សារព័ត៌មានយ៉ុនហាប់របស់កូរ៉េខាងត្បូង ធ្លាប់បានដកស្រង់ការផ្សាយពីសារព័ត៌មានរដ្ឋកូរ៉េខាងជើង ដែលបានព្យាករណ៍ថា លោក Moon Jae in នឹងវ៉ាដាច់បេក្ខជនប្រធានាធិបតីដទៃទៀត ហើយក្លាយជាប្រធានាធិបតីថ្មីរបស់កូរ៉េខាងត្បូង ខណៈដែលទីក្រុងព្យុងយ៉ាងចាត់ទុកថា លោក Moon ជាអ្នកដែលអាចធ្វើឲ្យទំនាក់ទំនងរវាងបងប្អូនកូរ៉េទាំងពីរ វិលទៅរកភាពប្រសើរឡើងវិញ តាមរយៈការចាប់យក នយោបាយចាស់ៗ ដែលធ្លាប់សម្រេចបានភាពស្ងប់ស្ងាត់កាលពីមុន។
កាលពីថ្ងៃចន្ទ កូរ៉េខាងជើងបានធ្វើឱ្យគ្រប់គ្នាភ្ញាក់ផ្អើល តាមរយៈការអំពាវនាវឲ្យបិទបញ្ចប់ការប្រឈមមុខដាក់គ្នា រវាងបងប្អូនកូរ៉េទំាងពីរ ខណៈកូរ៉េខាងត្បូងនឹងរៀបចំការបោះឆ្នោតជ្រើសរើសប្រធានាធិបតីថ្មីនៅថ្ងៃអង្គារស្អែកនេះ ស្របពេលដែលបេក្ខជនកំពុងនាំមុខ លោក Moon Jae-in បានបង្ហាញសញ្ញាវិជ្ជមានមកដល់កូរ៉េខាងជើងរួចទៅហើយថា លោកចង់បានទំនាក់ទំនងល្អប្រសើរឡើងវិញរវាងបងប្អូនកូរ៉េទាំងពីរ។
កាសែតកូរ៉េខាងជើង Rodong Sinmun នៅក្នុងបទវិចារណកថារបស់ខ្លួនបានលើកឡើងយ៉ាងដូច្នេះថា «សោកនាដកម្មនៃទំនាក់ទំនងរវាងកូរ៉េខាងជើង និងកូរ៉េខាងត្បូងបង្កឡើងដោយពួកអ្នកនយោបាយអភិរក្សនិយមកូរ៉េខាងត្បូង អស់រយៈពេលជាង ១០ឆ្នាំមកហើយ។ ពួកគេបានបង្កើតការប្រឈមមុខដាក់គ្នាជាអតិបរមា ទំាងផ្នែកនយោបាយ និងយោធា ហើយពួកគេក៏បានជាន់ឈ្លីផងដែរ នូវគំនិតចង់បានសន្តិភាពនៃប្រជាជនរបស់យើង។ ទោះបីជាយ៉ាងណាក៏ដោយ ប្រវត្តិសាស្ត្រនៃការប្រឈមមុខដាក់គ្នារវាងកូរ៉េទាំងពីរ ដែលត្រូវបានបង្កឡើងដោយពួកអ្នកអភិរក្សនិយម គួរតែត្រូវបានបញ្ចប់ រីឯសករាជថ្មីនៃការបង្រួបបង្រួមជាតិ គួរតែត្រូវបង្កើតឡើងតាមរយៈកិច្ចសហការរវាងជាតិសាសន៍របស់ពួកយើង ... តែបើពួកអ្នកអភិរក្សនិយម នៅតែអាចកាន់អំណាចសាជាថ្មី នោះវាមានតែការបាក់បែកតែប៉ុណ្ណោះ»។
នៅក្នុងចំណោមបេក្ខជនប្រធានាធិបតីទាំង០៥រូប លោក Moon Jae in មកពីគណបក្សប្រជាធិបតេយ្យ ត្រូវបានគេរំពឹងថា មានលទ្ធភាពខ្ពស់នឹងអាចជាប់ឆ្នោតជាប្រធានាធិបតីកូរ៉េខាងត្បូងទី១២។ មួយវិញទៀតបើសិនជាលោក Moon ជាប់ឆ្នោតមែននោះ នយោបាយកូរ៉េខាងត្បូងចំពោះកូរ៉េខាងជើង អាចនឹងផ្លាស់ប្ដូរទាំងស្រុងក៏ថាបាន ត្បិតលោកធ្លាប់បានបង្ហាញពីបំណងចង់ចរចាជាមួយកូរ៉េខាងជើង បើកតំបន់ឧស្សាហកម្មកែសុងឡើងវិញ ហើយនៅក្នុងករណីចាំបាច់ លោកថែមទាំងអះអាងថា មិនបាច់មានទំនាក់ទំនងរឹងមំាពេកជាមួយសហរដ្ឋអាមេរិកទៀតផង។
គួរបញ្ជាក់ថា កូរ៉េខាងត្បូងនៅថ្ងៃអង្គារ ទី០៩ ខែឧសភា ឆ្នាំ២០១៧នេះបានចាប់ផ្តើមរៀបចំការបោះឆ្នោតជ្រើសរើសប្រធានាធិបតីកូថ្មី ទី១២ ជំនួសលោកស្រី ផាក គឺនហេ ដែលត្រូវបានសភា និងតុលាការធម្មនុញ្ញទម្លាក់ចេញពីតំណែង ដោយសារតែរឿងអាស្រូវពុករលួយកាលពីខែមីនា។
ជាមួយគ្នានោះដែរ បើតាមការស្ទង់មតិជាច្រើន នៅក្នុងចំណោមបេក្ខជនប្រធានាធិបតីទំាង៥រូប មានដូចជា លោក Moon Jae-in, លោក Hong Joon-pyo, លោក Ahn Cheol-soo លោក Yoo Seong-min និងលោកស្រី Sim Sang-jeung គេសង្កេតឃើញថា លោក Moon Jae in មកពី គណបក្សប្រជាធិបតេយ្យ គឺមានលទ្ធភាពខ្ពស់ជាងគេថា នឹងអាចជាប់ឆ្នោតជាប្រធានាធិបតី។ ក៏ប៉ុន្តែអ្វីដែលសំខាន់ជាងនេះទៅទៀតនោះ គឺថាលោក Moon ជាអ្នកនយោបាយម្នាក់ ដែលអាចនឹងធ្វើឱ្យនយោបាយកូរ៉េខាងត្បូង ចំពោះកូរ៉េខាងជើង និងសហរដ្ឋអាមេរិក ផ្លាស់ប្ដូរទាំងស្រុង បើសិនជាលោកជាប់ឆ្នោតមែននោះ៕
