(វ៉ាស៊ីនតោន)៖ ក្រុមហ៊ុន Facebook នឹងបន្ថែមបុគ្គលិក ៣០០០នាក់ នៅឆ្នាំក្រោយនេះ ដើម្បីត្រួតពិនិត្យ និងលុបចោលរាល់វិដេអូពាក់ព័ន្ធនឹងអំពើ ឃាតកម្ម និងអត្តឃាត ឬហិង្សា ដែលផ្សាយផ្ទាល់ (Live) ឬត្រូវបានបង្ហោះនៅលើបណ្ដាញទំនាក់ទំនងសង្គមរបស់ខ្លួន។ នេះបើតាមនាយកប្រតិបត្តិ ក្រុមហ៊ុន Facebook លោក Mark Zuckerberg ដកស្រង់ដោយទីភ្នាក់ងារសារព័ត៌មាន Reuters នៅថ្ងៃពុធ ទី០៣ ខែមេសា ឆ្នាំ២០១៧។

លោក ​Mark Zuckerberg បានសរសេរនៅលើ Facebook ផ្ទាល់ខ្លួនដូច្នេះថា៖​ «បុគ្គលិកខាងលើ នឹងត្រូវបន្ថែមលើបុគ្គលិកបច្ចុប្បន្ន ៤៥០០នាក់ ដែលបាននិងកំពុងត្រួតពិនិត្យរាល់ការបង្ហាះ ដែលរំលោភបទបញ្ញត្តិរបស់ Facebook»។ ការជ្រើសរើសបុគ្គលិកបន្ថែម របស់បណ្ដាញទំនាក់ទំនងសង្គម ដ៏ល្បីមួយនេះ ធ្វើឡើងបន្ទាប់ពីសកម្មភាពហិង្សា និងអំពើឃាតកម្ម ឬក៏អត្តឃាត ត្រូវបានផ្សាយផ្ទាល់លើ Facebook ​ជាបន្តបន្ទាប់។

ជាក់ស្ដែងកាលពីប៉ុន្មានសប្ដាហ៍មុន បុរសជនជាតិថៃម្នាក់បានសម្លាប់កូនស្រីបង្កើតខ្លួនអាយុ១១ខែ ដោយផ្សាយផ្ទាល់នៅលើ Facebook មុននឹងរូបគេ សម្រេចចិត្តសម្លាប់ខ្លួនឯងតាមក្រោយ ហើយមួយថ្ងៃបន្ទាប់ វីដេអូនេះ មានអ្នកមើលរហូតដល់ទៅជាង ៣៧០,០០០នាក់ មុននឹងត្រូវលុបចេញ។ លើសពីនេះទៅទៀត អំពើឃាតកម្មផ្សាយផ្ទាល់របៀបនេះក៏ បានកើតឡើងផងដែរនៅទីក្រុង Chicago និង ទីក្រុង Cleveland សហរដ្ឋអាមេរិក៕