(ប៉ារីស)​៖ បេក្ខជនប្រធានាធិបតីបារាំង លោក Emmanuel Macron បាននិយាយថា សហភាពអឺរ៉ុប EU ត្រូវតែធ្វើកំណែទម្រង់ ឬក៏ចង់ប្រឈមមុខនឹងការបោះឆ្នោតប្រជាមតិ ឱ្យបារាំងចាកចេញពី EU (Frexit) តាមការចង់បានរបស់លោកស្រី Marine Le Pen បេក្ខជនប្រធានាធិបតីស្ដាំនិយមជ្រុល។ នេះបើតាម​ការចេញផ្សាយដោយសារព័ត៌មាន BBC នៅរសៀលថ្ងៃចន្ទ​ ទី០១ ខែឧសភា ឆ្នាំ២០១៧។​

ការលើក​ឡើងបែបនេះ​របស់លោក Macron ធ្វើឡើងនៅក្នុង​ឱកាសដែល​លោក និងគូប្រជែង​គឺលោកស្រី Marine Le Pen បានចូលរួមនៅ​ក្នុងយុទ្ធនាការ​រកសំឡេងឆ្នោត​រៀងៗខ្លួន កាលពីសប្ដាហ៍មុន។ អ្នកនយោបាយ​និយមកណ្ដាល​គំាទ្រអឺរ៉ុបរូបនេះ បានគូសបញ្ជាក់​ដូច្នេះថា «ខ្ញុំគឺជាអ្នក​គាំទ្រអឺរ៉ុប ខ្ញុំបានការពារ​ជានិច្ចនូវ​គោលគំនិត និងនយោបាយ​របស់អឺរ៉ុប​ពីព្រោះខ្ញុំជឿជាក់​ថា​ វាគឺជារឿង​ដ៏សំខាន់បំផុត​សម្រាប់​ប្រជាជនបារាំង និងសម្រាប់តួនាទី​ប្រទេសរបស់យើង​នៅក្នុងសកលភាវូបនីយកម្ម (...) ប៉ុន្តែទន្ទឹមគ្នា​នោះដែរ យើងកំពុងប្រឈមមុខ​នឹងស្ថានភាពធ្វើតាមមតិប្រជាជនរបស់យើង និងភាពមិន​ប្រក្រតីមួយ​ចំនួននៃ​សហភាពអឺរ៉ុប (...) ហើយខ្ញុំមិនចង់ឱ្យ EU ដំណើរការដូច​បច្ចុប្បន្ននេះទេ ត្បិតវាអាចនឹង​នាំឱ្យមាន Frexit ឬក៏មាន​លោកស្រី Marine Le Pen នៃគណបក្ស​រណសិរ្សជាតិ (FN)»។

គួរបញ្ជាក់ថា ប្រជាជនបារាំង​នឹងត្រូវសម្រេចជាថ្មី​ម្ដងទៀត រវាងលោក Emmanuel Macron និងលោកស្រី Marine Le Pen នៅក្នុងការបោះឆ្នោត​ជ្រើសរើស​ប្រធានាធិបតីបារាំង​ជុំទី០២ នៅថ្ងៃអាទិត្យ ទី០៧ ខែឧសភា ចុងសប្ដាហ៍នេះ ហើយបើតាមការស្ទង់មតិចុង​ក្រោយ លោក Macron អាចនឹងឈ្នះឆ្នោត​ជាប្រធានាធិបតីបារាំង ដោយទទួល​បានសំឡេងគាំទ្រ ៦០ភាគរយទល់នឹង ​៤០ភាគរយ​របស់លោកស្រី Le Pen។ ក៏ប៉ុន្តែ​គេមិនអាចមើល​រំលងបានឡើយ ចំពោះគោល​នយោបាយ​របស់​លោកស្រី Le Pen ដែលចាក់ចំ​ជម្រៅចិត្តប្រជាជន​បារាំងដូចជា វិបត្តិជនភៀសខ្លួន និងភេរវកម្ម​ជាដើម៕