(ប៉ារីស)៖ លោក ដូណាល់ ត្រាំ ប្រធានាធិបតីអាមេរិក កាលពីពេលថ្មីៗនេះបានលើកសរសើរចំពោះបេក្ខជនប្រធានាធិបតីស្តាំនិយមលោកស្រី Marine Le Pen ស្របពេលដែលលទ្ធផលនៃការបោះឆ្នោតជ្រើសរើសប្រធានាធិបតីបារាំង កាលពីថ្ងៃអាទិត្យកន្លងទៅនេះបង្ហាញថា លោកស្រីទទួលបានសំឡេងគាំទ្រគ្រប់គ្រាន់ ដើម្បីឈានដល់ការបោះឆ្នោតជុំទីពីរ ដែលនឹងប្រព្រឹត្តទៅនៅថ្ងៃទី០៧ ខែឧសភាខាងមុខ។
ការលើកសរសើរនេះមិនមានជារឿងគួរភ្ញាក់ផ្អើលឡើយបន្ទាប់ពីយើងបានដឹងថា ក្នុងយុទ្ធនាការឃោសនាបោះឆ្នោតនោះ គោលនយោបាយលោកស្រីផ្ទាល់មិនខុសពីលោក ដូណាល់ ត្រាំ ឡើយ ដោយលោកស្រីបានបង្ហាញការប្រឆាំងជនអន្តោប្រវេសន៍ ជនជាតិមូស្លីម និងអំពើភេរវកម្មជាដើម។
ម្យ៉ាងវិញទៀត លោក ត្រាំ ហាក់មិនមានភាពស្ទាក់ស្ទើរ ក្នុងការលើកសរសើរលោកស្រី Le Penឡើយ បើទោះបីជាស្ត្រីរូបនេះបានបង្ហាញការគាំទ្រទៅលើលោក វ្ល៉ាឌីមៀ ពូទីន ស្របពេលដែលរដ្ឋមន្ត្រីការបរទេសអាមេរិក ទើបតែលើកឡើងកាលពីសប្តាហ៍មុនថា ទំនាក់ទំនងរុស្ស៊ី-អាមេរិក ឈានដល់ដំណាក់កាលទាបបំផុតមិនធ្លាប់មានពីមុនមក។
ការមកដល់នៃវត្តមានរបស់ លោកស្រី Le Pen ក្នុងនាមជាប្រធានាធិបតីបារាំង នឹងបង្កឥទ្ធិពលវិជ្ជមានជាខ្លាំងដល់ពាណិជ្ជកម្ម និងហរិញ្ញវត្ថុរបស់សហរដ្ឋអាមេរិក។ ប្រសិនបើបេក្ខជនប្រធានាធិបតីស្ត្រីរូបនេះឈ្នះឆ្នោត លោកស្រីនឹងដកប្រទេសបារាំងពីតំបន់ចាយប្រាក់អឺរ៉ូ ជាហេតុនាំឱ្យប្រាក់អឺរ៉ូ ត្រូវដាំក្បាលចុះ ចំណែកប្រាក់ដុល្លារឡើងខ្ពស់វិញ។ បន្ទាប់មកផលិតផលរបស់សហរដ្ឋអាមេរិក ដែលដាក់លក់នៅបរទេសនឹងបានតម្លៃខ្ពស់ជាងមុន។ ផ្ទុយទៅវិញបើលោក Macron ជាប់ឆ្នោត លោកនឹងបង្ហាញការគាំទ្រទៅលើសហភាពអឺរ៉ុប ព្រមទាំងពង្រឹងអង្គការណាតូទៅវិញ នេះជាអ្វីដែលផ្ទុយពីឆន្ទៈរបស់សហរដ្ឋអាមេរិក។
បើទោះបីជាលោក ត្រាំ មិនបានបង្ហាញការគាំទ្រជាផ្លូវការទៅលើលោកស្រី Le Pen ប៉ុន្តែក្នុងរយៈពេលប្រមាណពីរបីថ្ងៃមុនការបោះឆ្នោតប្រធានាធិបតីបារាំងកើតឡើង លោកបានលើកឡើងថា «លោកស្រី Le Pen ជាមនុស្សដែលមានភាពរឹងមាំក្នុងការគ្រប់គ្រងទៅលើអ្វី ដែលកំពុងកើតឡើងក្នុងប្រទេសបារាំង ព្រមទាំងបានបន្ថែមថា លោកស្រីមានភាពរឹងមាំខ្លាំងបំផុតទៅលើបញ្ហាព្រំដែន»។
ថ្លែងពីប្រទេសរុស្ស៊ីវិញ ខណៈដែលលោកស្រីបានជួបជាមួយលោក ពូទីន ក្នុងទីក្រុងម៉ូស្គូកាលពីពីរបីសប្តាហ៍មុន លោកស្រីត្រូវបានគេចាត់ទុកថា ជាបេក្ខជនប្រធានាធិបតីតែមួយរូបគត់ក្នុងចំណោម១១រូបផ្សេងទៀត ដែលធ្វើកិច្ចជំនួបជាមួយប្រធានាធិបតីរុស្ស៊ី។ លោកស្រីបានបង្ហាញបំណងចង់ជួយដល់រុស្ស៊ី ក្នុងដំណាក់កាលនៃការពង្រឹងសហភាពអឺរ៉ុបផងដែរ។ មិនតែប៉ុណ្ណោះលោកស្រីថែមទាំងបានប្តេជាក្នុងការដកប្រទេសបារាំង ចេញពីអង្គការណាតូ ដែលការពិតទៅនេះណាតូ គ្រាន់តែជាសម្ព័ន្ធយោធាមួយ ដែលមានតួនាទីសំខាន់ក្នុងការត្រួតពិនិត្យទៅលើសកម្មភាពយោធារុស្ស៊ីប៉ុណ្ណោះ។
ជាងនេះទៅទៀតនោះ លោកស្រីក៏បានស្នើសុំបញ្ចប់ការដាក់ទណ្ឌកម្មរបស់សហភាពអឺរ៉ុបទៅលើប្រទេស រុស្ស៊ី ដែលការដាក់ទណ្ឌកម្មនេះ ត្រូវបានធ្វើឡើងបន្ទាប់ពីរុស្ស៊ីដណ្តើមតំបន់គ្រីមៀពីអ៊ុយក្រែន ដោយលោកស្រីបានលើកឡើងថា ការដាក់ទណ្ឌកម្មនេះជារឿងមិនយុត្តិធម៌ និងឆ្កួតឡប់ជាទីបំផុត។
លោកស្រី Le Pen បង្ហាញសញ្ញាចង់ចងសម្ព័ន្ធជាមួយរុស្ស៊ី។ លោកស្រី Le Pen ធ្លាប់ទទួលបានប្រាក់កម្ចីរហូតដល់៩លានអឺរ៉ូពីធនាគាររុស្ស៊ី ដើម្បីឧបត្ថមដល់ការឃោសនាបោះឆ្នោតរបស់លោកស្រីផ្ទាល់។ ជាមួយគ្នានេះដែរ ក៏មានការលេចលឺនូវព័ត៌មានថា ថ្មីៗនេះភ្នាក់ងារស៊ើបអង្កេតរុស្ស៊ី កំពុងព្យាយាមអន្តរាគមន៍ទៅលើការបោះឆ្នោតនៅបារាំង ដើម្បីជួយបង្កើនសំឡេងឆ្នោតលោកស្រី ដែលរឿងនេះមិនខុសអីនឹងពាក្យចោទប្រកាន់កន្លងមកថា រុស្ស៊ីក៏ស្ថិតនៅពីក្រោយខ្នងការបោះឆ្នោតអាមេរិចដូចគ្នា។
ហេតុផលខាងលើអាចបញ្ជាក់បានថា ទាំងប្រធានាធិបតីអាមេរិក និងរុស្ស៊ីសុទ្ធតែមានបំណងចង់ឱ្យលោកស្រីជាប់ឆ្នោត បន្ទាប់ពីដឹងថា វត្តមានរបស់លោកស្រីក្នុងនាមជាប្រធានាធិបតី នឹងផ្តល់ប្រយោជន៍ដល់ប្រទេសទាំងពីរ៕
បកប្រែ និងសម្រួលដោយ៖ អ៊ឹត ចណ្ណា
