(បាងកក)៖ បន្ទាប់ពីបានចេញសេចក្តីប្រកាស អំពីពេលវេលានៃព្រះរាជពិធីបូជាព្រះសព​អតីតព្រះមហាក្សត្រថៃ ព្រះបាទ ភូមិបុល អាប់ឌុលយ៉ាដេត នោះ ឧបនាយករដ្ឋមន្ត្រីថៃលោក Wissanu Krea-ngam បានប្រកាសនៅថ្ងៃ​សុក្រ​នេះថា ព្រះរាជពិធីឡើង​គ្រងរាជ្យសម្បត្តិជាផ្លូវការ​របស់ស្តេចអង្គថ្មី ព្រះបាទ មហា វិច្ចិរ៉ាឡុងកន នឹងប្រារព្ធធ្វើឡើងនៅអំឡុងចុងឆ្នាំ២០១៧ខាងមុខនេះ។ នេះបើតាមការដកស្រង់ការផ្សាយ​របស់ Channel News Asia ប្រភពដើមពី Reuters នារសៀលថ្ងៃសុក្រ ទី២១ ខែមេសា ឆ្នាំ២០១៧។

ទោះបីជាបែបនេះក្តី លោក Wissanu Krea-ngam មិនបានបញ្ជាក់នោះទេថា នៅចុងឆ្នាំនោះគឺជាខែអ្វីឲ្យប្រាកដ ដែលនឹងត្រូវប្រារព្ធពិធីឡើងគ្រងរាជ្យសម្បត្តិ ជារឿងដ៏មហាកម្រកំរបំផុត នៅក្នុងបណ្តាខ្សែរាជវង្ស​មិនថាតែនៅព្រះរាជាណាចក្រថៃឡង់ដ៍នោះឡើយ។

គួរបញ្ជាក់ថា ព្រះសពរបស់អតីតព្រះមហាក្សត្រថៃ ព្រះបាទ ភូមិបុល អាប់ឌុលយ៉ាដេត ត្រូវបានគេដឹងថា នឹងត្រូវប្រារព្ធព្រះរាជពិធីបូជា នៅថ្ងៃទី២៦ ខែតុលា ឆ្នាំ២០១៧ ខាងមុខនេះ ដែលវាមានរយៈមួយឆ្នាំ និង១៣ថ្ងៃ បន្ទាប់ពីព្រះអង្គសោយទិវង្គតនៅក្នុងមន្ទីរពេទ្យទីក្រុងបាងកកប្រទេសថៃ។

អតីតព្រះមហាក្សត្រថៃ ព្រះបាទ ភូមិបុល អាប់ឌុលយ៉ាដេត បានសោយព្រះទិវង្គតក្នុងជន្មាយុ ៨៨ព្រះវស្សានៅថ្ងៃទី១៣ ខែតុលា ឆ្នាំ២០១៦ ក្រោយពីទទួលរងអការៈរោគរុំារ៉ៃអស់ជាច្រើនឆ្នាំ ប៉ុន្តែព្រះអង្គមិនដែលបានយាងទៅព្យាបាលនៅបរទេសនោះឡើយ។ ក្រោយព្រះអង្គសោយទិវង្គត រាជទាយាទព្រះនាម មហា វិច្ចិរ៉ាឡុងកន បានឡើងគ្រងរាជ្យសម្បត្តិបន្តនៅដើមខែធ្នូ ឆ្នាំ២០១៦។

សម្រាប់ការសម្រេចព្រះរាជពិធីបូជាព្រះសព ដែលនឹងប្រារព្ធទៅរយៈពេល ០៥ថ្ងៃ ចាប់ផ្តើមពីថ្ងៃទី២៦ ខែតុលា ឆ្នាំ២០១៧នោះ គឺវាសមស្របទៅ​តាមសេចក្តីប្រកាស​​របស់រាជរដ្ឋាភិបាល​ថៃ ដែលកាលពីអតីត​ព្រះមហាក្សត្រ​ដែលប្រជាជនថៃ​គោរពស្រឡាញ់​ជាងជីវិតនេះ បានសោយទិវង្គតបាន​ប៉ុន្មានថ្ងៃបាន​ប្រកាសថា ព្រះសពរបស់ព្រះអង្គ នឹងត្រូវតម្កល់ទុកក្នុងរាជវាំងរយៈពេលមួយឆ្នាំ​ ទើបប្រារព្ធព្រះរាជពិធីបូជា ហើយក្រោយពីពិធី​បូជាចប់រួចរាល់នោះ ព្រះរាជពិធីដ៏ធំ​ជាផ្លូវការនៃការឡើង​​គ្រងរាជ្យសម្បតិ្តរបស់​ស្តេចអង្គថ្មី ក៏នឹងត្រូវរៀបចំ​ឡើងផងដែរ៕