(វ៉ាស៊ីនតោន)៖ រដ្ឋមន្ត្រីការបរទេសអាមេរិកលោក រិច ធីល្លឺសុន បានបង្ហាញពីយុទ្ធសាស្ត្រថ្មី ដែលអាមេរិកកំពុងគិតគូរធ្វើ នោះគឺការគ្រោងដាក់កូរ៉េខាងជើង ចូលទៅក្នុងបញ្ជីនៃរដ្ឋគាំទ្រក្រុមភេរវករឡើងវិញ ដើម្បីជាការដាក់សម្ពាធឲ្យទីក្រុងព្យុងយ៉ាង ចូលរួមកិច្ចចរចាជាមួយទីក្រុងវ៉ាស៊ីនតោន ដែលនឹងក្លាយជាការបោះជំហានមួយ ខុសប្លែកពីកិច្ចចរចាមុនៗ។ នេះបើតាមការចេញផ្សាយដោយទីភ្នាក់ងារព័ត៌មានចិនស៊ិនហួរ នាព្រឹកថ្ងៃព្រហស្បតិ៍ ទី២០ ខែមេសា ឆ្នាំ២០១៧។
ថ្លែងនៅក្នុងសន្និសីទសារព័ត៌មានមួយក្នុងរដ្ឋធានីវ៉ាស៊ីនតោន លោក ធីល្លឺសុន បានបញ្ជាក់ថា រដ្ឋបាលរបស់ប្រធានាធិបតីអាមេរិកលោក ដូណាល់ ត្រាំ មានគ្រប់ជំរើសទាំងអស់នៅក្នុងដៃ ដើម្បីដោះស្រាយបញ្ហាកូរ៉េខាងជើង ដោយក្នុងនោះមានទាំងការគ្រោងដាក់បញ្ជូនកូរ៉េខាងជើង ទៅក្នុងបញ្ជីនៃរដ្ឋគាំទ្រភេរវកម្ម ដែលនឹងដាក់សម្ពាធបន្ថែមដល់ទីក្រុងព្យុងយ៉ាង រហូតដល់ព្រមចូលតុចរចាគ្នាជាមួយអាមេរិកតែម្តង ដែលជាវិធីខុសប្លែកពីកិច្ចចរចាកាលពីអតីតរដ្ឋបាលអាមេរិកមុនៗ។
គួរបញ្ជាក់ថា កាលពីដើមខែមេសាកន្លងទៅនេះ សភាអាមេរិកបានអនុម័យទៅលើបទបញ្ជាស្របច្បាប់មួយទៅកាន់ក្រសួងការបរទេស ឲ្យធ្វើការពិនិត្យស្រាវជ្រាវឡើងវិញថា តើកូរ៉េខាងជើងពិតជារដ្ឋដែលបាន និងកំពុងគាំទ្រអំពើភេរវកម្មដែរ ឬក៏យ៉ាងណា? ប៉ុន្តែរហូតមកដល់ពេលនេះ គេនៅពុំទាន់ទទួលបានព័ត៌មានថា ព្រឹទ្ធសភាអាមេរិកបានបោះឆ្នោតគាំទ្រ ចំពោះអ្វីដែលរដ្ឋសភាបានដាក់ជូននោះនៅឡើយទេ ដោយវាត្រូវការរយៈពេលប្រមាណ ៩០ថ្ងៃទើបចេញលទ្ធផល។
សូមរំលឹកទៀតថា អតីតរដ្ឋបាលអាមេរិករបស់លោក George W. Bush កាលពីឆ្នាំ២០០៨ បានដកឈ្មោះកូរ៉េខាងជើងចេញពីបញ្ជីនៃរដ្ឋគាំទ្រភេរវកម្ម ជាថ្នូរនឹងទីក្រុងព្យុងយ៉ាង ដែលព្រមធ្វើការដកថយរឿងកម្មវិធីនុយក្លេអ៊ែរដ៏ចម្រូងចម្រាសនាជំនាន់នោះ៕
