(មូស៊ុល)៖ ការវាយប្រយុទ្ធគ្នារវាងកងកម្លាំងរដ្ឋាភិបាលអ៊ីរ៉ាក់ ជាមួយពួកសកម្មប្រយុទ្ធ ISIS នៅភាគខាងលិចទីក្រុងម៉ូស៊ុលបាន និងកំពុងបង្កជាគ្រោះមហន្តរាយមនុស្សជាតិដ៏អាក្រក់បំផុត។ នេះបើតាមការព្រមានធ្ងន់ៗ របស់មន្ត្រីជាប់ខ្ពស់នៃអង្គការសហប្រជាជាតិ (UN) ដកស្រង់ដោយសារព័ត៌មាន Russian Today នៅរសៀលថ្ងៃពុធ ទី១៩ ខែមេសា ឆ្នាំ២០១៧។

ទីក្រុងម៉ូស៊ុល បានធា្លក់ចូលទៅ​ក្រោមការគ្រប់គ្រង​របស់ពួក ISIS​ កាលពីពាក់​កណ្ដាល​ឆ្នាំ២០១៤​កន្លងទៅ។ ប៉ុន្តែ​បច្ចុប្បន្ន​កងកម្លំាង​រដ្ឋាភិបាល​អ៊ីរ៉ាក់ និងកងជីវពល​ឃើដ ដោយមាន​ការគំាទ្រ​ពីក្រុមចំរុះ​អន្តរជាតិ របស់​សហរដ្ឋអាមេរិក បានវាយ​ដណ្ដើមយក​ទឹកដីមួយផ្នែក​ធំ​ នៃភាគខាងលិច​ទីក្រុងមួយនេះ​បានមកវិញបណ្តើរៗ។

យ៉ាងក៏ដោយ​ប្រជាជនអ៊ីរ៉ាក់​រាប់ម៉ឺននាក់​នៅតែបន្តជាប់គាំង នៅតាមតំបន់ជាយក្រុង​មួយចំនួន​ដូច Old City ជាដើម។ ដោយឡែកជុំវិញ​សង្រ្គាមនេះដែរ ថ្លែងនៅក្នុង​បទសម្ភាសន៍​ឱ្យទីភ្នាក់ងារ​សារព័ត៌មាន Reuters​ លោកស្រី Lisa Grande មន្ត្រី UN ទទួលបន្ទុកផ្ដល់ជំនួយសម្រាប់អ៊ីរ៉ាក់ បានគូសបញ្ជាក់យ៉ាងដូច្នេះថា «បើសិនជា​មានការ​ឡោមព័ទ្ធ ហើយមនុស្ស​រាប់ម៉ឺននាក់​គ្មានទឹក និងម្ហូបអាហារនោះវានឹងក្លាយ​ជាហានិភ័យ មួយដ៏ធំ ខណៈយើង​កំពុងប្រឈមមុខ​នឹងគ្រោះមហន្តរាយមនុស្សជាតិ​ដ៏អាក្រក់បំ​ផុតស្រាប់ ដែលកើតចេញ​ពីសង្រ្គាម​រវាងកងកម្លាំងរដ្ឋាភិបាល​អ៊ីរ៉ាក់ និងក្រុមរដ្ឋអ៊ីស្លាម ISIS»។

គួរបញ្ជាក់ថា បើតាមអង្គការ​សហប្រជាជាតិ ប្រជាជនអ៊ីរ៉ាក់ ១៥០,០០០នាក់ បានរត់ភៀស​ខ្លួនចេញពី​ទីក្រុងម៉ូស៊ុល រីឯមនុស្ស ៦០០,០០០នាក់ទៀត​បន្តស្ថិតនៅក្នុង ទីក្រុងនេះ​នៅឡើយ ហើយមនុស្សប្រមាណ ៤០០,០០០នាក់ ក្នុងចំណោមពួកគេ​កំពុងជាប់គាំង​នៅក្នុង​ទីក្រុង Old City ដែលនៅជាប់នឹងម៉ូស៊ុលតែម្តង៕