(ឥណ្ឌូណេស៊ី)៖ ភ្នំភ្លើងដ៏ចំណាស់ Sinabung នៅលើកោះស៊ូម៉ាត្រា ប្រទេសឥណ្ឌូណេស៊ី បានផ្ទុះ​នៅថ្ងៃពុធនេះ ដោយបញ្ចេញឧស្ម័ន និងកម្អែលផេះជះទៅលើអាកាសកម្ពស់ ៣គីឡូម៉ែត្រ និងគ្របដណ្ដប់នៅលើផ្ទៃមេឃយ៉ាងក្រាស់ក្រែល ដែលអាចឃើញពីលើសាលារៀន​នៅភាគខាងជើង​នៃកោះមួយនេះ ក៏ប៉ុន្តែក្មេងៗនៅតែបន្តរត់លេងដូចធម្មតា។ នេះបើតាមការចេញផ្សាយដោយសារព័ត៌មាន Channel News Asia នៅរសៀលថ្ងៃពុធ ទី១២ ខែមេសា ឆ្នាំ២០១៧។

ជាមួយគ្នានោះដែរ​បើតាមអាជ្ញាធរ​នៅក្នុងតំបន់ ពុំទាន់មាន​សេចក្ដីរាយការណ៍​ណាមួយពីជនរងគ្រោះ​នោះទេ ខណៈប្រជាជន​ជិត ២,០០០គ្រួសារ ត្រូវ បានជម្លៀស​ជាបណ្ដោះអាសន្ន​ទៅកាន់ទីទួលមានសុវត្ថិភាព ស្ថិតនៅចំងាយ​០៧គីឡូម៉ែត្រពី​តំបន់ភ្នំភ្លើង Sinabung។

គួរបញ្ជាក់ថា​ភ្នំភ្លើង Sinabung បានផ្ទុះជាលើក​ដំបូងក្នុងរយៈជាង​៤០០ឆ្នាំ, ឆ្នាំ២០១០កន្លងទៅ, ហើយកាលពីខែឧសភា ឆ្នាំ២០១៦ មនុស្ស០៧នាក់បានស្លាប់ ដោយសារបន្ទុះភ្នំភ្លើងមួយនេះ និង១៦នាក់ទៀត​ក៏បានស្លាប់ផងដែរកាលពីខែកុម្ភៈ ឆ្នាំ២០១៤។ ឥណ្ឌូណេស៊ី មានភ្នំភ្លើង១៣០ទីតាំង​ ក៏ព្រោះតែសណ្ឋានដីប្រទេសមួយនេះ ស្ថិតនៅលើតំបន់ខ្សែក្រវ៉ាត់ភ្នំភ្លើងនៃសមុទ្រប៉ាស៊ីហ្វិក៕