(អាមេរិក)៖ ភាគហ៊ុនរបស់ក្រុមហ៊ុនអាកាសចរណ៍ United Airline បានធ្លាក់ចុះដល់ទៅ៦ភាគរយ ឬស្មើនឹង​ ១.៤ពាន់លានដុល្លារគិតត្រឹមរសៀលថ្ងៃអង្គារម្សិលមិញ បន្ទាប់ពីវិដេអូមួយបង្ហាញពីបុរសម្នាក់ ត្រូវក្រុមសន្តិសុខក្រុមហ៊ុនអាកាសចរណ៍មួយនេះ អូសចុះ​ពី​លើ​យន្ត​ហោះ​យ៉ាង​ព្រៃ​ផ្សៃ​ជាទី​បំផុត ត្រូវបានគេបង្ហោះលើបណ្ដាញទំនាក់ទំនងសង្គម និងរកការិះគន់ព្រមទាំងថ្កោលទោសពីសំណាក់​មហាជនក្នុងប្រទេស និងពិភពលោក។ នេះ​បើ​តាម​ការ​សារព័ត៌មាន Huffington Post នៅ​​រសៀលថ្ងៃ​ពុធ ទី១២ ខែមេសា ឆ្នាំ២០១៧​។

ដើមចមនៃ​ហេតុការណ៍នេះ គឺពីដំបូងឡើយក្រុមហ៊ុន​អាកាសចរណ៍ United Airline បានស្នើឲ្យអ្នក​ដំណើរផ្តល់កន្លែង​អង្គុយរបស់​ពួកគេ​ដោយស្ម័គ្រចិត្ត ជា​ថ្នូរ​នឹងការ​​សង​ជំងឺចិត្ត ដោយសារតែ​សហសេវិក​ចំនួនបួននាក់​ ត្រូវការឡើងជិះនៅលើជើងហោះហើរនេះ ហើយនៅពេល​ដែលពុំមានអ្នកព្រមចុះចេញ​តាមសម្រួល សន្តិសុខ​របស់​ United Airline ក៏បានសម្រេច​ជ្រើសរើសបុរសម្នាក់​ ដែលត្រូវបានគេកំណត់​អត្តសញ្ញាថា​ជាជនជាតិវៀតណាម សញ្ជាតិអាមេរិក ឈ្មោះ David Dao ឲ្យចាកចេញពី​លើយន្តហោះ ប៉ុន្តែ​នៅ​ពេល​​លោក Dao បានបដិសេធក្រុមសន្តិសុខក៏បានអូស និងទាញរូបលោកចេញពី​កន្លែងអង្គុយយ៉ាង​សាហាវព្រៃផ្សៃ​ជាទីបំផុត។

គួរបញ្ជាក់ថា ក្រោយពីមានការខឹងសម្បារ និងរិះគន់យ៉ាងខ្លាំងក្លាពីសំណាក់មជ្ឈដ្ឋានសាធារណៈ នាយកប្រតិបត្តិនៃក្រុមហ៊ុនអាកាសចរណ៍ United Airline ក៏​បាន​ចេញ​មុខ​​សូម​អភ័យទោស​ចំពោះហេតុការណ៍​នេះ ថាមិនគួរឲ្យកើតមាន​ឡើងនោះឡើយ ខណៈភ្នាក់ងារ​សន្តិសុខម្នាក់របស់​អាកាសរណ៍ត្រូវបាន​ព្យួរការងារជា​បណ្តោះ​អាសន្ន។ មតិតាមបណ្តាញសង្គម ដែលបានទស្សនាវីដេអូ បានធ្វើរិះគន់យ៉ាងធ្ងន់ និងមានការចោទជាសំនួរថា «តើនេះ ឬជាទង្វើនៃប្រទេសដែលតាំងខ្លួន ជាអ្នកគោរពសិទ្ធិមនុស្ស?» ខណៈដែលនេះជាកំហុសរបស់ក្រុមហ៊ុនអាកាសចរណ៍ខាងលើនេះសុទ្ធសាធ ដែលបានដាក់អ្នកដំណើរ​លើសចំណុះដោយមិនប្រយ័ត្នប្រយែង ចំពោះតួនាទីខ្លួនឯង៕